Vondeih Kep Ding – 8 (Pau Khan Kap)

Vondeih Kep Ding – 8

Kongit Tawgno,
Inn ah ka om lai-in annek ciangin na pu in hong gen thei zel thu khat hong gen kik ning! Sihzang gam khua khat ah eibang mah in a cimawh leh a genthei innkuan khat om uhi. Nikhat ni ciangin innkuan nuntak haksat manin akhawi sa a Sakol uh hong zuak uhi. A deihzah uh khawng thei pak lo-in tua paukhankapcidan in tawlkhat hong om khit ciangin hong kidawp sam hi. A sakzah uh leh Sakol deih te’ leinop (ngam) na kituak thei mahmah lo-in hong ki deekdeek uh-a, a nunung ah innteek nu in Sakol deih te kiang ah, “ U te aw, tua ahih leh innsung ah tawmvei na ngak lai-un la, inn nung aa om ka pa kiang ah no deihzah in hong piak ngam ding leh hong piak ngam loh ding vadong phot ning” ci-in inn nung lam ah a pa kiang dong dingin pai hi, ci hi!

Na pu in honggen ciangin tua te innkuan pen a pa un a nusia khin hi-in, inn nung ah apai hangin a pa uh a dong ding hilo-in, a Sakol manzah ding khensat haksa-in, tua thu ngaihsun dingin apai hi, hong ci hi.Tua manin “Sanggam Sihzang te’n a nu si sate uh, a pa si sate uh thu dong” ci-in khanglui te’n gen hi, ci-in hong gen pen tudong ciangin kabil kha in zaza lai hi.

Na pu in bang deihna nei-in, hong gen cih nang’ zong thei dingin hong lam en ing, Tawngno. ‘Thu haksa khat peuh na tuah ciangin khen sat pahpah lo-in, dam in ngaihsun masa phot in, a zenzen in na khensat zawh kei vua leh zong na nu te kiang ahi zongin, na pa te kiang ahi zongin, no sang in a thei zaw khat peuhpeuh kiang ah dong un’ a hong ci nuam hi.

Tawngno aw, haksatna khat peuh peuh na tuah ciangin nong dot thei dingin ko na nu leh na pa uh dam lai buang hive ungh. Hongpai in la hong gen dih in. Na haksatna te, na lungkham nate kikum khawm dih ni! Mi in ‘a nu si sa uh, a pa si sa uh zong thu dong’ kici lai buang hi ven! Nang adam lai na nu leh na pa kiang hong dong lo ding maw!

Hong it,
Napa
March 17, 2013