News tomkim lak khawm (24 Feb 2017)

News tomkim lak khawm (24 Feb 2017)

Feb. 24, 2017: # Chinese Defense Ministry in zan in South China Sea (SCS) ah USte teembaw puakna vanleng hon “aircraft carrier strike group” kicite om mah hi cih kithei a, SCS pen leitung bup kitangna tuipi ahih manin kuapeuhin suakta takin teembaw taisak theihna “freedom of navigation” ding kizahtak hi ci-in gen hi. China in bel ni dangin SCS ah freedom of navigation om ding pen zadah mahmah a, amau bekin hih tuipi ah thuneihna nei ut uh a, Obama’ administration hun lai-in US-China kitelsiam lohna lianpen suak hi. US Navy in SCS ah aircraft carrier kitaisak teembawte lakah USS Carl Vinson leh Nimitz-class aircraft carrier kihel a, a ngeina bangin “routine operation” nei uh hi ci hi. – The Hindu

# Syria kumpi in Aleppo lak ding a hanciam manin (tu-in la zo ta) rebelste kilemna ding kihona a neih uh kha 10 a kidiah dildel khit nungin Russia, Iran leh Turkey hanciamna tawh zanin Geneva, Switzerland ah “Syrian peace talks” kipan kik a, Syria kumpi leh kumpi langpang (opposition) palaite kihel hi. A beisa kum khat in Syria President Assad’ dinmun leh Aleppo kilak khit nung a dinmun kibang nawn lo a, US makaih nitumna gam leh Arab gam ten Assad a kitawp dingin a kalhna uh pen nuhzakhuai, kilawm lo (absurd) hi ci-in UN a Russia palai leh peace talk om kik theihna dingin Syria kumpi leh oppositionte kikal a palai a pang top negotiator Alexie Borodavkin in ci a, hih peace talks ading agenda bang teng hi ding hiam cih man (ready) nai lo a, UN thukimna bang tawh election neih hun ding, constitution thak gelh (draft) thakna ding agenda ah kihelsak ding ka ummawh hi ci hi. Russia, Iran leh Turkey makaihna tawh nung diakin Kazakhstan khuapi Astana ah ceasefire thukimna Syria kumpi leh rebels ten a neih theih manun peace talks kipan kik thei suak hi. – The Hindu

# US gam North Dakota ah datsi lawng (oil pipelines) kikhung ding dal a lungphona neite “anti-Dakota pipeline protesters” kici ten kum khat phial camp ah a om khit nungun zan in lungphona nei ten a camp uh North Dakota prairie land kicihna mun nusiatsan ta uh hi. Lungphona nei a kisa lah diak mi (activists) 10 kiim in a camp uh nusiatsan hun dinga kipia hunciam (dateline) nusia lo uh ahih manin zan 2:00pm (2000 GMT) in kiman hi ci-in North Dakota Joint Information Center in ci hi. – AFP

# France president kiteelna ding ah first round ah gambeel, adiakin Muslimte lutsak lo ding a tangkpih Far-right makai pi Marie Le Pen in Centrist candidate pu Macron zo dingin kilamen a, BVA poll in a genna ah Ms. Pen in Mr. Macron 61% -39% in zo ding hi ci hi. Ahih hangin tu lianin May 7 kiteelna ah Ms. Pen in centre-right candidate Francois Fillon zo lo dingin ki-ummawh lai hi. – Reuters

# Ecuador president kiteelna ah Nipini in first round ah leftist candidate Lenin Morena in kiteel kikna a om nawn lohna dingin vote kicing ngah zo lo ahih manin zanhal in Election Commissioner in April 2 ciangin kiteelna om kik dinga, tua ah Moreno leh conservative candidate Guillermo Lasso kituh ding uh hi ci-in pulak hi. – AFP

# Bangladesh khuapi Dhaka a teng laigelh siam minthang Sharif Rehman in London khuapi-a cina a om a zi a veh sawm leh London ah a lengkhiat ding kikhawlsak hi. Rehman pen Bangladesh Prime Minister Sheikh Hasina’ tapa thah sawm ci-in kiman a, kha nga sung thong ah a kikhum khit in bail in nung kum September kha-in kikhah khia kik hi. – AFP

# President Trump in gambeelte lutsak lohna ding leh kulh cian ding a sawmna hangin US-Mexico kitanauna nakpi takin sia hi. Zan in US Secretary of State Rex Tillerson leh Homeland Security Secretary John Kelly in amau za let kibatpih Mexico uliante kimuhpihna Mexico City ah nei uh a, Mexican President Pena Nieto tawh kimuh ding Tillerson leh Kelly in a sawm hangun ko tawh thukimna i neih khit ciang bekin ka President uh na kimuhpih thei bek ding uh hi cih san ahih manin ki-akgual khen uh hi. – The Hindu

# Zan in Pakistan gam-a Lahore khuapi sunga building kibawl lai khat kang a, tua bulding ah bomb kikoih puakkham hi. Meikang in building kibawlna kiim a om mawtaw parking peh phei gawp ahih manin mi 8 in sihna tuak hi. Mi 8 a sih banah mi 30 kiim in liamna tuak hi ci-in Counter-Terrorism Department (CDT) ten pulak uh hi. – AP

# Iraq galkap ten zan in ISte ukna khuapi Mosul sunga om Mosul airport la zo ta khongkhong uh hi. Mosul khuapi pen nung kum October 17 in Iraq galkap leh a pawlte leh US makaih leh a pawl ten lak kikna dingin “Final Operation for Liberation of Mosul” kici galdo na kipan uh a, Mosul nisuahna lam bel la zo pan uh hi. ISte leilu, leitaw lam ah zong pangin nitumna lamah busa uh hi. Iraqi Elite Counter Terrorism force kici galkap ten leitaw-nitumna lam panin nawk uh a, Ghozlani army base kici galkapte phual, Tal al-Rumman lel al-Momoun leilu-nitumna lam district lut ta uh hi. Iraq galkap ten nung kha-in Mosul nisuahna lam panin ISte hawl khia zo uh hi. – The Hindu

# Malaysia gamte khuapi Kuala Lumpur airport ah North Korea leikhamang Kim Jong-un’ sanggam langpa (half-brother) Kim Jon-nam a kithah khit ni sawm sung a daih dide khit ciangin zan in North Korea in a kam hong kek khia pan a, Kim Jong-nam pen ko thah hilo hilo in Malaysia leh South Korea kipawl (kigulluk) in a thah uh hi ci-in ngawh a, Kim Jong-nam sihna thu a genna ah kuama min tuang sak loin North Korea mi that ci-in a ngawhna lai saupi comments suaksak hi. Kim Jong-nam’ luang pen Malaysia ah autopsy leh forensic examination a bawl khit nangawn in a luang North Korea pia khia nai loin misipa’ DNA sample North Korea tung panin a nget lai manin North Koreate thangpai hi.

Malaysia in Kim Jong-nam’ innkuanpihte DNA sample a ngetna hang pen a khualzinna lai poimawhte ah a min a manin tuang lo a, North Korea leikhamang innkuanpih mah hiam cih a kitel theihna dingin a nget ahi hi. Malaysian police chief Khalid Abu Bakar in Kim Jong-nam that dinga ki-ummawh N.Korea agency ten a thah khit nungun Malay gam panin tai khia pah uh ahih manin tuate a kimat theihna dingin Interpol (international police)-te kimansa leh kigingsa-in a omna dingun thu zasak hi. – The Hindu

# Phalna lai poimawh nei loin gambeel ahih manin US panin thum vei a kihawl kik kum 44 mi Mexico gammi Guadalupu Olivas Valencia kici Tuesday in US gamgi panin a kimuh theihna ding lei (bridge) feet 100 tung panin tuak lum hi. President Trump in phalna lai pomawh nei lo gambeel (undocumented migrants) khempeuh puak khiat cih a pulak khit nunga thupiang ahi hi. -AFP

# Hillary Clinton’ tanu Chelsea Clinton’ tanu kum nih mi Charlotte Clinton Mezvinsy in amasa pen dingin Muslimte a gupna lahna dingin Monday in New York khuapi Times Square kicihna munah “I am Muslim too” (Kei zong Muslim mah hi ing) cih mihon kikaikhawmna (rally) ah kihel hi ci-in The Hill in suaksak hi. Hih “I am Muslim too” rally ah Chelsea Clinton zong kihel ahih manin a tanu a tonpih hi a, ahih hangin Charlotte Clinton Mezvinsy pen khuapi sunga na khat sepna peuhah a kisalah diak mi/ a om khong thei lo (activist) ci-in a min kigen pah ngeingai dep hi. Chelsea Clinton in a Twitter ah a nuta un a kihelna uh tuangsak a, “Hih banga mipi kikaihkhawmna nong bawl manun lungdam ing. Tu ni-in #IAmMuslimToo ah ka kihel a, mipi kikhawmte lahah a masa pen dingin Charlotte zong lungphona neite lakah hi kihel hi. #NoBanNoWallNoRaid” cih tuangsak hi. -PTI

More: News tomkim lak khawm (23 Feb 2017)

# UN Secretary-General Antonio Guterres in zanhal in Nigeria leilu lam, Somalia leh Yemen gamte kial tun’na dingin a sik/a mong (brink) ding uh hi ci-in pulak hi. Tu kalin UN in South Sudan ah kial (famine) tung ta hi ci-in na pulak hi. Leitungah mihing million 20 pen kial tun’na sik/mong a ding uh a, tua lak panin million 1.4 naupang pen zatui kisam leh gilkial in puksih ding ngak uh hi. July 2011 in zong Somalia gamah kial na tung ngei a, mihing 260,000 si hi. Leitungah nek ding kisapna hangin 30% bang gilkial in natna nei om a, an nek ding kicing nei loin nisim in mi 10,000 si den hi. UN in hih banga cimawhte huhna dingin sum kicing nei zo lo a, $ 5.6 billion bang a tawm pen in kisam napi tua lak panin khut sungah 2% bek kinei hi UN Sec-Gen. Guterres in ci hi. -NYT

A LUNGGAIHHUAI KAMMAL
“Leitung in mi khempeuh kitangsapna a kicingin hong pia zo a, ahih hangin mi khempeuh duhhawpna, huaihamna, hazatna hong pia zo lo hi.” – Mahatma Gandhi/ Thang Khan Lian