Vondeih Kep Ding – 35 (Pau Khan Kap)

Dear Tawngno,
Na pa in ka lawmte kiang ah ‘thonginn sungah ka koihnop mite’ ka gen leh hong thukimpih pawlkhat om in, pawl khat in bel uang hong sa uh hi. Midang cih thadah nang mahmah zong zi nei-in ta na neih ciang na tate i pau, i lai na theih sak kei peuhmah leh na pa in hong koihthong hethet lo ding hi’ng. Midangte in namdang numeite teenpih in ei pau, ei lai siamsak in pau sak a, a gelh sak laitak, e’n i sungpan in apiang i suan i khak te i lai, i pau theisak lo-in pau sak thei kei mawk leng abang ci mi himawk ding! Tua bang mite sih zaw leh hoih kasa lai hi. Hih bang mite in ka lungsim hong sukha mahmah ahih manin na pa in konggen sa ahih hangin hong gen kikkik kha hi ing.

1970s kiim pawlin a suak zomite sung ah natna hoih lo a piangsak virus khat nalut hi. Zogam aom zomite sung bek hilo-in kawlzaang aom zomite sung ah zong tua virus lut ahih manin zomite omna khempeuh ah tua virus hangin natna lian mahmah khat piang in tuni dongin damsiang thei nai lo hi. Tuin tua natna avei mite zogam bek hilo, leitung mun tuamtuam aom zomite om na mun ah kitheh thang uh ahih man in a natna uh damdam in hong lawh toto ta-a,tu laitak zomite sung ah tua virus in hong ne tum gai dekdek ta hi.

Na pa in zong ka omna mun pan, ka nasep kawmkawm mah in ka hih zawhzah hanciam in hih virus ka thah zawhna dingin ka hanciam hi. Library pai in hih virus tawh kisai laibu ka sim a, online panin zong hih virus pian zia latest research ka kan zawh zah in ka kan hi. Ahi zongin‘hih zatui tawh hoih hi,’ cih mu nai lo kahih manin ka dah mahmah hi.

Zogam ah tu laitak hih virus hangin nasia tak in natna piang a, US ah zong tuma kum(2) lai khawng tawh ka etkak ciangin tukum in a zahnih bangin khang kasa hi. Tu-a bang tain hong piang toto mawk leh tuzawh kum (10) sungin zomite beimang le hang kilawm sa ing.

Ei innkuan sungah hih virus hong lut lohna dingin nang tawh hanciam in pangkhawm leng ut ing. Tua khit ciangin i veng te, tua ciang i pawlpi leh i khua sungah cih bangin abanban in sem toto leng ci ing.

Hong it,
Napa

Columbus, OH
July 18, 2016

P.S: Lai-ip sung ka guan ding ciangin ka khialhna khat peuh aom kha tam ci-in ka laigelhte kasim kik leh tua virus min kong gelh loh lam ka phawk kik hi. Na pa in hih virus min dingin, ‘Founder And President Virus’ ka na ci hi. Zomite sung ah hih‘Founder and President Virus’ in natna lianpi hong piansak laitak hi.