Vondeih Kep Ding – 22
Kong it Tawngno,
Tu nungkal sungin laibu sai khat ah laibu en in ka va pai leh kum lui-a nasep khop pih te khat tawh upmawh loh pi-in ka kimu kha dih dih hi. Nau nih na nei uh a, a gol zaw pen kum (5), a nau pen mai kha ah kum ( 3 ) sung lut ta ding hong ci hi.
Laibu en kawmkawm in nasep vai leh innlam thu khawng kikum in ka paupau uh hi. Na theihsa mah bangin na pa bel laibu sai pai leng bangmah ka lei kei zongin a tawmpen nai ( 2 ), nai ( 3 ) sung bang ka om hi. Tun zong tua mah bangin lawmpa tawh laibu sai ah laibu teng 
phekphek in ka om thapai uh hi. Ama’n a tano te’ et ding ‘cartoon laibu’ hon khat leisak hi. Ka ciah ciangin kimuh loh zong sawt ta ci-in kalawm kiang ah,“ Kimuh ding zong a haksat tawh hun na ngah leh niang dawn in tawm vei tawl nga phei ni” ci-in laibu sai mai aom ‘Starbuck’ niangtui sai ah ka khawl pih phei hi.
Na pa’n hih mun ah ka tut tak uh ciangin ka lungsim aa om ka vangik khat hong zang tuam pah hi. Coffee hong tun zong ngak zo nawn lo-in ka lawm kiang ah ka lungsim vangik puak pen ka dong pah hi. “ Kei tawh bel kisai kei, ahi zongin lawm aw, bang hangin na tano te’ min pen ei’ min phuak lo-in ‘James leh Monica’ ci-in mikang ( English ) min phuak sese nai vua?” ci-in ka dong hi.
“ Ei min zong a deih lo hi keng. Ei min in hi leh midangte in a sap uh ciangin lawh hak sa, sap hak sa uh a, ahi zongin mikang min hi leh amau a tawh kibang pah ahi manin lawh khialh sap khialh om nawn lo-in ol tak in sam thei ziauziau uh, tua hang hi,” hong ci hi. “ Aw tua dan hi zaw maw,” ci-in tua thu tawh kisai bangmah ka kuppih nawn kei hi.
Tawng aw, tua nitak ka ciahna lam tawntung ah khe tawh ka pai na, bus ka tuan na leh ka lupna tung na leng ah hih thu hangin na pa ka lungtang na in, meimat lawh paukhankapliang hi. Mi in hong sap theih ziau na dingin ei zo min phuak sawm nawn lo-in, mikang min a phuak, namdang min a phawk ziau i mipih i sapih te Zogam, Kawlgam, Vaigam, Nisuah nitum na gam ah bang zah aom zen tam!
Khua hun kilaih tawh na pa zong annek tuidawn kidawm mahmah ing! Kei kong omloh hangin na nau tawh na nu’ thu na mang un!
Hong it,
Na pa
April 26, 2014
Columbus, OH
Comment piaknop aomleh...