Vondeih Kep Ding – 20 (Pau Khan Kap)

Vondeih Kep Ding – 20

Kong it Tawngno,

Zanni tak ka lup ciangin a beisa 2013 kum ka Diary ka sim kik leh abei sa kum a ka gamtatna te, ka khualzinna te phawk in ka lungleng in ka ihmu thei pak kei hi. ‘ Bang cia sim kik sese kai tam’ ci-in ka ihmut theih loh ciangin kei leh kei ka kimawh sak liang hi. Tua leh na pa’n kong gen nop thu khat ka phawk lak hi.

Tunung kum Feb 24 nipi ni-in Sia Dokham ( Dr. Chin Do Kham ) pen ka omna uh panin nai 2 sung khawng mawtaw a kihawl na ‘Cleveland’ acih na panin na pa te ka om na uh pawlpi ZCC, Columbus ah hong kikhawm in hatthotna hong pia phei hi. Tua ni zan pen pawlpi keem ka Siapa uh Rev. Paupi te’n ah giak hi. Napa zong Sia Dokham nohsiat dingin pawlpi keem siapa ten ah kikhop tuak ciangin ka pai suak hi.

Sia Dokham in kawlgam hong ciah sungin ‘Zomi leh Zogam’ a dingin asep abawl te leh mailam ah a ngimna te, a geelsa thute hong gen in cilltui kai liangin ka ngai hi. Tomvei sungin zankiim hong hita ahih manin Siapa zong zingsang ciangin maban nei lai ahih manin ciah dingin ka kitawi hi. Ka paikhak ding ciangin, “ Sia aw, na ciah ciangin lamkaal ah na niang dawn’ na dingin na zang in,” ci-in $50 lai-ip tawh ka pia hi. Sia Dokham in, “ Lungdam ing ei” ci-in ka khut hong len hi.

October, 2013 in Siapa in hong nusiat vat ciangin ka dah mahmah a, ahi zongin ka lungkim mahmah hi. Siapa adam lai-in a kiang ah pai-in a thugen ngaihsak in na pa’n ka neihsun sum tawm cik ka piak khak manin hong nusiat hangin ka lungkim hi. Na pa’n ka deihna tel dingin hong um ing. Na pa ka gamtatna ah kisik lo hi ing.

Na pa’n ka laigelh ngei Dr. Dokham in hoih a sak khat nang kong khak leh kong khak loh tel nawn keng. “Ka Sih Khit Ciang” cih thulu hi-in nasim khak nai kei leh www.zomidaily.com ah na zong le cin om ding hi. Na muh pak kei leh hong gen kik in, hong khak ding hi ing. Na pa in ka lunggulh tua hi!

paukhankap

Khangluite in, ‘ Mihing leh papo’ ci uh hi. Na upmawh loh na kigin loh laitak in na it penpen khat in hong nusia leh na lung akim zo tattak diam!

Hong it den,
Na pa
February 28, 2014
Columbus, USA