Vondeih Kep Ding – 145 (Dimno’ Pa)

Vondeih Kep Ding – 145 (Dimno’ Pa)

Tawngno, The Washington Post panin ka simkhak thu thak khat: Sente in a gamsung aom mi hoihlote a matna dingun Facial Recognition technology zang in, a beisa kum 2 sungin mi hoihlo 2,000 val bang mankhin uh hi, ci hi.

A manlang dan pen a gambup mi 1.4 billion te maitang scan na dingpen second khat bek kai a, leitung bup mimal 7.6 billion te scan na ding pen second nih bek zekai ding cita lawmlawm hi. Japan te-in zong 2020 Summer Olympics ah security dingin hih facial recognition technology zat ding tangkona nei khin uh hi.

Facebook te’n zong hih facial-recognition technology zang ahih manin ih photo te upload le hang automatic in ei leh i lawmte hong thei ziau hi. Leitung hong neu tektek ta-in, kua ma muhloh in kibukcip thei hong om nawn lo dekdek ta hi.

Na pa nong sut leh nialhat ding na hih manin nialhat zong a hoih teei hangin a hoih lohna zong om veve hi. Khat veivei ciangin i suplawhna zong om thei zawsawp hi.

Ka boss te tawh ka kinial ngei a, ken ka zo hi. Ahi zongin ka nasep ka tan lawh hi.

Ka lawmte tawh ka kinial ngei a, ken ka zo hi. Ahi zongin ka lawmte ka tan lawh hi.

Ka naseppihte tawh ka kinial ngei a, ken ka zo hi. Ahi zongin ka naseppihte ka tan lawh hi.

Ka lawmngaihte tawh ka kinial ngei a, ken ka zo hi. Ahi zongin ka lawmngaihnu ka tan lawh hi.

Kam kinial ka zawh hangin a mi sum hi ing. A mi ka sup pen kei ading panin supna lianpi hong suak zaw a, kei a sum mah hong suak zaw ing. Lesson in la thei le cin ut ing.

“Do not look a gift cow in the mouth.”

“Letsong in hong kipia Bawng pen a ha va en se ken,” ci hi. A khawnkhong in itna tak tawh hong kipia na khempeuh lungdam koh ding hi-a, hoih le hoih lo sit ding hi lo hi.

Hong it,
Na Pa
April 3, 2018