Vondeih Kep Ding – 142 (Dimno’ Pa)

Vondeih Kep Ding – 142 (Dimno’ Pa)

Tawngno, Mi hau semsem i cih hangin a haute a hau semsem hi bek a, a zawngte neihsa kibeh laplap tuan lo hi. Ih khua sung, i gam sung bek hi lo-in leitung mahmah ah zong a haute a nini in hau semsem uh a, hauhna leh zawngna pen kikhai semsem ta hi. 2030 ciangin leitung mihaupen 1% te-in leitung hauhna sehthum suah sehnih amau khutsung ah om tading hi, ci hi. Tu laitak in leitung hauhna 50.1% pen hih mihaute khutsung ah om hi ci-in, nung kum Credit Suisse te report na-ah gen uh hi. A haute hong hau to semsem ding a, a neilote bel tua bang mah in a om toto ding himai ta hi. Dahhuai simsim sang!

Ei kiangah khua hong lum pianpian hangin ko lam bel vot acih in vot mahmah lai mawk in puanlum mah tawh kituntun in om lai mawk! Khuadam a nop teei hangin baih kei sa ing.

Zanni in ka thului sim khat ah Tembaw nasem Kawlgam mi nih Germany gam ansai (Duh zahzah nek theihna Buffet sai hilo) khat ah an ne-in, a gaih zawh loh, a khamvalte a kuang ah tua ci-a nusiat leh Police te pai-in sum gam uh hi. ‘Ka sum uh tawh ka leikhit sa uh hi,’ acih leh, ‘sum pen no neihsa hi-a, an ahih leh mi tampi neihkhop hi, ci-hi, ci mawk hi. Diksa lua mahmah ing.

Ei kiang hita leh Zogam ah hita leh ankhing kham zolo hinapi hangin an it lo-in, ankuang ah an tampipi nusia in paai mawk hi hang. Gaih zawh loh ding pi thuk in, gaih zawh loh ding pi la-in i khamvalteng ninbung sung tun hi hang. Mikim in an itna lungsim kinei zo nai lo hi. Na kikholhpih na lawmte a tua ci aom leh na hilh in. Buhhum tang khat hong piang khiatna dingin hun sawtpi ngak bek hi lo-in, sum leh paai tampi leh thagui thatang tampi abei lam pen i theih sa tek hi. Ngontat hun beisak in it ta ding hi hang.

Germany gam bangin ankuang ah an khamval a ciansakte kiman ding hileh i khuazang bup bek hi lo-in i gambup phial in kiman mawk ding hi hang. Nek ding nei lo mi tampi aom na lai-ah i tuaci gamtat pen mulkimhuai liang sa ing. Pangkhawm ding hi hang!

Hong it,
Na Pa

Columbus,OH
March 6, 2018