Vondeih Kep Ding – 141 (Dimno’ Pa)

Vondeih Kep Ding – 141 (Dimno’ Pa)

Dear Tawngno, January kha in World Bank te lai suaksak khat ah kum sim in mihing 1.25 million bang lampi ah accident na hangin si a, 20-50 million bang nasiatak in liam uh hi, ci hi. A tamzaw mun pen Low-income leh Middle-income countries te hi, ci uh hi. Leitung tawh genteh sese ta kei leng zong i khua sung bekbek ah kha khat sungin motorcycle accidents bangzah om cih na theih hi.

Ih Smart Phone te a kisiat khak ding dalna in a tuamna hoih lei in tuam tangtang sam hive hang. Tuate sangin i nuntakna manpha zaw sam ding hiven, pilvang huai sa ing.

Zogam ading, leh Zomi adingin la tawh kisai ah i mi masa ahi, T.S. Khai late khat ah, ‘Mikim in paubaanna khat ciat nei, muan pen zong upmawh loh piang kha theih,’ cih khat ka neulai un ki sasa hi. Paubaanna nei lo ki-om lo takpi in, mikim in paubaanna khat ciat kinei kimtek hi. Tua bek hi lo-in kivakna, thahat deuh zawkna zong khat ciat kinei kim tek lai hi.

Nidang lai in, Sakol khat leh Bawng khat lawmta in om hi. Nikhat a om hithiat laitak uh upmawh lohpi-in singbaak khat a kilak vuah hong kia vat hi. Amau zong lau in thakhat in hong tai uh hi.

Tawlkhat khit ciangin Sakol in a lawm kiang ah, “Tai zong hat kei na lawmlawm si cia. Upmawh lohpi na tungah hong kia hi leh bang cih mawk ding,” ci-in nuihsa kawm in hong paupih hi.

“Zawl aw, kei pen nang zah in tai hat kei mah ing. Tua pen ka thanemna zong himai thei in teh. Ahi zongin vangik lompi puakawm in khual gamlapi paizo hi ing.”

“Nang tai na hat hangin vangik lompi pua kawmin khual gamlapi pai ding hile cin na tai hatna pen kimanna hong nei khol lo thei ding hi,” ci-in Bawng in hong dawng kik hi.

Hi takpi mah hi. A tamzawte in ei thahatna pen ciimtuai in zangin midangte tehden tawntung hi hang. Mikim in paubaanna nei kim i hih manin mi thu i gen ding sim in ei zong a cingtak taktak mah ihi hiam cih kingaihsun masa leng ut ing.

Khanglai ding khangno khat cidamna dingin nikhat in nai 7-9 hrs sung ihmut ding kisam ci ahih manin vai phamawh dang tuamtuam aom kei leh cih lo buangin ihmu tanvei ding kipelh sak kei in. Cidamna in nopsakna leh hauhna lian penpente lak ah khat mah in ngaihsun ing.

Hong it,
Na Pa

Columbus, OH
March 3, 2018