Vondeih Kep Ding – 135 (Dimno’ Pa)

Vondeih Kep Ding – 135 (Dimno’ Pa)

Tawngno,
A tamzawte-in amau za tepna leh a zu suaina uh pen a kholhpih a lawmte uh hang hi, ci uh hi. Ahih na ciang bel om in um mah ing. Ahi zongin mi hoih ding khat pen a kiim leh a paam a siat hangin tua siatna in susia zo in um lo hi ing. Na pa pom zia hi-in, nang pomzia koidan ahi tam bel thei sam keng.

Ei kivakna mun ah ma i pan loh ciang, ei mun lo pi ding ah i om ciangin mi dongtang sak, mi ngawnkai sak kisuak lel hi. Saya U Aung Thin in a gen ngei khat, “Samzang pen i lu tungah om leh etlawm mahmah a, ahi zongin ankuang sungah hong om leh kihhuai mahmah hi,” ci hi. Hi peuhmah takpi hi. Na pa zong nial hat mahmah napi-ing in khat veivei ciang mi in na hong ci leh ka kivakloh hinapi-in nial lo-in sang thei zanzan hi ing. Kei leh kei a kitheician taktak nai lo ka hih lam damdam in theician pan ing.

Zawng khat innkhum tungah kahto-in a nuai panin a en mipite a ma hih theih a siamna tuamtuamte lak in, mipite’n thangah in ot san in, khutbet san ziahziah hi.

Laa in zong tua na mu-in, Zawng manciang innkhum tungah kahto-in Zawng hih dan mah in ahih leh innkhum tungteng kisia gawp in, singtom teng kitam gawp hi.
Inn nei pa in amuh ciangin heh cihtak in heh in, a nasemte sam in tua Laa man sak in vathual sak gawp hi.
Ei tawh kisai lo, ei dinmun lopi ah mapangin i hih ciang hidan kituak thei takpi hi. Hih dante bel Monkey Business cise uh hi.

Pasalte in a lawmngaihte uh nisim in mumu nuam napi uh in, numeite in nisim in ki mumu leng kining lua, gen ding zong bei! Kal khat in khat vei, nih vei khawng ki mu leng i zinkhong zaw, cise uh hi. Na ki control zawh leh amau hoih sak dan zui zaw in!

Hong it,
Na Pa

Columbus, Oh
February 9, 2018