Vondeih Kep Ding – 128 (Dimno’ Pa)

Vondeih Kep Ding – 128 (Dimno’ Pa)

Dear Tawngno,
Tawngno aw, midangte hauhna eng ding mah hi-in, ahi zongin haza lo ding hi hang. Pawlkhatte pen a innvengte uh saklampan in khualzin hong ciah a thuahpha sim pian khawng om leh langbawl keei in, hopih nuam lo keei, cihdan khawng om mawk hi. Tuadan lungsim pen hoih lo hi. Thu khat panin midangte nuntak zia leh ei nuntak zia pen tehkak kak lo ding hi hang.

Amau tot lampi leh ei tot lampi kibang lo-in, amau amau lampi ah pai in, ei zong ei lampi mah ah a paipai hi hang. Mi lawhcingte in a gen uh ciangin, ‘midangte tawh kiteh lo-in zanni leh tuni ka kibang hiam, ka khangto zaw hiam, ci-in ei leh ei kitehkak ding hi hang,’ ci uh hi.

Tuhun mi tampite-in na khat peuhpeuh a deih ciangin a hoihna ding thu zongzong in, a deih nawn loh uh ciangin a hoihlohna ding a zongzong lam zong phawk huai sa ing. Thu a khen uh ciangin a thu tungah kinga nawn lo-in, amau lungsim panin a hoih sak leh a hoih sak loh masak zaw in tua tungah kinga in thu a khen kitam zaw ta hi. Khangnote bek hi lo-in i makai tampi tak zong tua ci gai khin mawk uh hi.

President Donald Trump in Supreme Court Judge dingin a nominate Neil Gorsuch a kithudot lai in a gen khat ah, “Thu ka khen ciangin na dang khempeuh ka nusia a, tua a Thu tung ah sia maw pha, cih ka en a, tua tungtawn in ka khensat hi,” ci-in a genna khat za ngei ing.

Diksa in, hoih sa lua mahmah ing. Ei a te-in thu a khen uh ciangin, amah pen ka behpa ahih teh, amah pen ka khuapih pa a hih teh, amah pen ka pawlpi mi ahih teh, amah pen ka mipihte ahih teh, cihdan in thukhen zaw mawk uh a, a thu tung taktak ah a khuak nga in thu a khen pen tawm lai leh kilawm sa ing.

Aungbali pauh te leh lampi a kia sumbawm mu te, suang manpha kia mu te pen mi hampha, mi kaampha te hi lo uh hi. Kholhpih ding lawm hoih a nei te, thudot ding sia hoih a nei te, lamhilh ding makai hoih a nei te pen mi hamphate hizaw uh hi.

Hong it,
Na Pa

January 25, 2018