Vondeih Kep Ding – 11 (Pau Khan Kap)

Vondeih Kep Ding – 11

Kong it Tawng,

Tawngno aw, zanni in na nu tawh ka ki hopih leh na nu in “Thangpi zong kua tawh ki thei ahi tam, ngaih khat khawng nei hi ding hiam, tusung teng aom dan hong kilamdang keei veh aw! Fair And Lovely bang hong lei sak in, nu aw hong ci keei in, hong kipuah keei veh” ci-in hong gen hi ven!

Na nu’n hong gen thu te ka zak ciangin na pa’n tha na ngah mahmah ing! Pasal khat hih buang hive hang numei hoih sak nei mah lo ding maw! Numei hoih sak nei thei lo-in, lawm peuh nong ngaih theih loh khak ding pen na pa nalau simsim zaw ingh! Nang, a ngai hak hi zaw lai cei! Na paukhankappa’n bang tan ( 2 ) kakah lai pek a kipan, ka sangkah pih numei te hoih sak nei in, a mau theih loh kal in na ngai sim ngei hing. Kamuh nop man bekbek in a innmai lampi khawng ah lengpeei khat tawh kileh suk kileh to-in, amau hong theih ding lah lau sim pian, zumpian si-in om in, kua ma theih loh pi-in a innmai khawng ah kapai ciangin kamai zumin ka kisuang sim mahmah pong hi.

Tun zong nang’ na tua cih ding lamtak hong thei ing. Bangbang ahi zongin i it, i ngaih te’ mai ah a kua kua maizum in, a ki zahtak hi dingin um ing! Na kikholh pih na lawmte khat peuh in “ banghang in tua nu, ngai nai a?” ci-in hong dong leh na bang ci gen tam! Azenzen in napa’n hong dong leng e leh koi dan in nong dawng tam? Ka phawk lai-in hih thutawh kisai kong kuppih nop, kong gennop om mah ei.

College kum nihna ka kah lai-in ka kikhop pih mahmah kalawm thantalang te khat pen ka theih loh kal un Falam nungak te khat na na ngaisim in, a it a ngaihna zong lai-in na khak hi. A nungak nu zong numei dang pawlkhat te bangin a ngai lo pi, a ngai kineih khem in ka lawmpa na na gaam gawp lo-in, a san zawh loh na leh a ngaih zawh loh na ahang hoihtak leh siangtak in kalawm kiang na gen hi. Tua ciangin kalawm zong a ngaih mahmah khat in a itna sang zolo hi mawk ahih manin nasa lua in heart broken in, tua ciangin lawm a na ngaihsim khinkhian lam ka thei khia pan uh hi. A lungsim na sa lua mahmah hi ding hiven, Sang bang hong pelh zo liang hi. Hun khat khit ciangin kalawm pa’ kiang ah “ bang hang a hih dan zahta in nasa nai a, tua mi san zawh loh pi khawng?” ka cih leh “ lawm aw, tua dan hi kei, hih nu pen a lawmdang te bang lo-in numei hoih mahmah khat hi-in, a pi cing mahmah khat zong hi. Pasal gina lo khatpeuh khut sung a tun khak ding pen pammaih sa lua ingh” ci-in hong gen ngeungau hi.

Tua zawh kum ( 10 ) khawng ahi tam maw, tun U.S ka tun leuleu ciangin ka ompih tangval te khat in nungak khat hong ngai in, na pa zong a sitni sim pian hi ding ka hiam, kalawm kiang ah “ banghang a tua nungak nu ngai nai a?” ci-in ka va dong kha hi. “ Amah bel neulai pian si tawh, kipuah dan zong siamnai lo-in, kipuah dan kawng pantah nuam e maw,” ci-in hong gen hi.

Na pa’n ka tuah khak kalawm nih te’, ‘itna leh ngaihna’ thu hi.

Tawng, nang’ itna ahang e leh gen ding hi le cin, bang ci bangin genin banghang na ci tam? Gen kizom lo, na nu tawh ka kimuh cil uh, na nu ka ngaihna ahang khawng, ka love story khawng uh e na thei nuam hia? Na nu’n bel ‘gengen kul kei’ cise ven ah! Aih zong na theih nop leh na nu’ theih loh kal in hong gen sim ning. Eh! Na pa’n zong na belle nu’ min khawng a nu leh a pa te khawng e thei nuam kai maw!

Lai at,
Napa
April 30, 2013

Columbus, Oh, U.S.A.