Valentine’s Day “Lawm kingai te ni” ~ Peter Suumpi

Valentine’s Day “Lawm kingai te ni” ~ Peter Suumpi

Lawm kingai te ni ihcih pen lawm kingai te aading anuntakna apiakhia misiangtho Valentine akipahtawi ni ahi hi. Catholic tangthu sung ah hileh valentine min apua misiangtho thum tak om hi. Athum un pawlpi aading anuntakna pia aa asi salpha vive ahi uh hi. Khat pen Rome aa om Fr.Valentine akici khat ahi hi. Anihna pen Interamna khuapi aa bishop Valentine ahi hi. Interamna khua ihcih pen tu hun ah Terni akici Italy gam ii khuapi khat ahi hi. Athumna pen bel Rome empire ii khut nuai aa om Afarica aa om Fr.Valentine ci in thum tak om hi.

Ireland gam Dublin diocese siampi khat ahi Fr. Frank O’Gara ii genna pan ahileh tuni aa lawm kingai te ni ci aa mitampi te in nopci tak aa abawl uh pawi pen Rome gam aa lawm kingai te muan le suan salpha ahi, Fr. Valentine pahtawina ni akibawl ni pan hong kipan khia hi ci in nagen hi.

Fr. Valentine pen AD 178 kum, Feb 14 ni in Rome kumpi, Claudius II ii kumpi sep hun laitak in akithat ahi hi. Kumpi Claudius II pen agilo mahmah kumpi khat ahi hi. Akumpi gam athahat semsem nading in galkap bekbek kaikhawm hi. Ahizong in agam mite in tua kumpi pa aading galkpa tum ding na nial uh hi. Kumpi pa zong alam-et zah in galkap kaikhawm zo kisa lo ahihman in akumpi zaliatna hong zang in agam ah akhuah mahmah thupiakna khat hong ginkhia sak hi.

Ama gam ukna sung aa om khangno khua mah in zi nei thei lo ding ci in thupiak hi. Ahang pen lawm kingai te, kiteenna te hangin khangno te in galkap tum ding a utlo hi ci in kumpi pa in a-up man ahi hi. Tua hangin Rome khuapi sung ah tangval khangno akici peuh mah zi neilo in galkap tum ding thupiakna hong bawl ahihi.

Kumpipa thukhun pen dik hetlo hi ci in Fr. Valentine in hong nial pah hi. Tua hangin zong kumpipa thupiak nial in lawm kingai te asimtham in letthat(marriage) simsim hi. Ni khat leinui kuahawn sung ah nupa te aletthat laitak in Claudius II ii galkap khat in na mu in tua pan man in kumpipa mai ah hong kaigawp pah hi. Mulkim huaitak in abawlsiat khit ciang Febuary 14 ni in ngawngtan in that uh hi.

Hih Fr. Valentine in thatna athuakma – thong sungah a om lai in, Asterius akici thongcing pa khat atanu mittaw khat aading thu angetsak nading na ngen hi. Fr Valentine in zong thungetsak amathu ngetna le Pasian vangliatna tawh tua thongcingpa tanu in khua hong mukik hi. Fr Valentine tungtawn in Pasian nasepna amuh ciangin lamdang sa in tua thongcing pa zong tuikiphum in Christian hong suak hi. Hih bang in tua thongcing pa, Asterius te innkuan tawh hong kimel theih semsem uh hi. Fr pa akithat lupma anunung pen in tua thongcingpa tanu kiang ah lai hong khak hi. Alaikhak ii laigual tawpna ah “nong it nang ii Valentine” ci in gelh hi. Hih laigelh zia hangin tuni dong lawm kingai te lai akikhak uh ciangin atawpna ah “ nong it nang ii …” ci in akizang ahi hi kici hi.

Hih bangin Fr Valentine in alaigelhna te aki et ciangin tangthu kante in Fr Valentine pen tua thongcingpa tanu tawh kingai ahihman in hih bang in lai akhak hi ci uh hi. Christian te aading in misiangtho Valentine pen lawm kingai te acing akem misiangtho khat ahihmah bang in Christian ahilo te aading in lawm kingai te salpha in kiciamteh hi. Misiangtho Valentine ii pawi ni pen Catholic pawlpi in ama pawi ni tawh kisai pen AD 1969 kum pan pawlpi calendar sung ah guang pan hi. Tua pan amun mun ah apawi ni hong kibawl ziah ziah hi.

Atangthu dang khat lai ah misiangtho Valentine ii pawi ni pen tanglai Rome te neih pawipi khat ahi Lupercalia pawi pan hong kipan khia hi aci zong om leuleu hi. Tua pawi ni pen Feb15 ni in akibawl ahi hi. Kum 800 bang akibawl tua pawi pen Lupercalia pasian pahtawina in akibawl ahi hi. Tua ni in nungak te singkuang sung ah kikoih in tangval te’n adieh uh teel thei hi. Tu ni hun tawh gen lehang ziding meesawk cih dan ahi hi. Tua ihteel singkuang sung aa om nungak pen ih tenpih ding hipah hi.

Tua hun lai in zong hih pawi pen lawm kingai te akikaih khopna pawi hi ci in kithei hi. AD 469 kum ciangin Pope Gelasius in hih ‘Feast of Lupercalia’ pawi pan in lawm kingai te aading anuntakna apia salpha misiangtho Valentine pahtawina ni in hong laih hi. Hih bang in tangthu te kigelh kawikawi himah taleh Feb 14 ni pen lawm kingai te ni ci in leitung bup in sangkim gai uh hi. Tua ahih man in khangno lawm kingai te in hih ni ciangin lesong te, pakte, lakam hoih nono te kipia uh hi.

Ki-it kingaihna thu tawh ahileh mihing te pen kingeek, kinehno mahmah hi. Itna tawh kisai pen kua kumpi kua kumpi in ama zialiatna suang in khaktan zolo hi cih pen ihtheih ahi hi. Tua ahihman in ‘lawm kingai te ni’ cih pen itna hang aa hong piang khia ni, misiangtho Valentine ii kipiakkhiatna akiciaptehna ni khat ahi hi. Lailet — Peter Suumpi Sr: ဇိုလက္ေဆာင္ေရးသာေသာ – Valentine’s day “ခ်စ္သူမ်ားေန႕ဆိုသည္မွာ” zolai aa letkik ahihi.