GZA pan thu zaksakna (09 Feb 2016)

Global Zomi Alliance thu zaksakna
I pianna Kawlgam leh sim le mal, leitungbup aa om Zomi khempeuh i biak Pasian’ min tawh na khut uh kong len masa hi. Tung Pasian kiang panin daihna leh nopsakna note khempeuh tungah hong tung kim ciat tahen!

Tutungin kong gennop thu lian (3) om hi. Amasa penin kum sima i bawl February 20 ni-in Zomi Nam Ni na omna munmun uh ah kilomkhat-in na na bawlkim ciat na’ngun itna tawh kong zasak hi. I minam i kepcingna khat zong hi-in Zomibup aading i biak Pasian kiangah thu i ngetna zong ahi hi. Zomibup in Pasian’ thupha sangin ki-itna leh kipumkhatna nei-a neih le lam zong a kicingtak aa Pasian’ kiang pan i ngah nadingin Zomi Nam Ni, February 20 ni (Saturday) in thungetna leh itna tawh thu kihilhna, thugenna i neih ciat dingin kong hanthawn hi. Hih Zomi Nam Ni in Zomite hong mainawtsak in, hong kipumkhat sak ding lam-etna lianpi i nei hi. Ko Yangon panin zong ahi thei banga bawl dingin ka geel uh hi.

Kong zaksaknop thu nihna pen hong kitaangko sa mah bangin tu 2016 kum November 24 – 27 ciang Yangon khuapi ah GZA Khawmpi om ding hi. GZA ii mailam kalsuanzia ding leh Makai thak ding kiteelna zong om ding ahih manin leitungbup aa om Zomi khempeuh in hanciamin nong paitek nadingun itna tawh hong samin kong zawn hi. Hong hanciam mahmah un!

Kong kutnop a thu thumna pen tu-in Kawlgam Makai ding kumpi thak hong ding zo-a, tua bang mahin Zogam Makai ding kumpi thak zong hong dingta hi. Hih makaite in amau deih bangin hong makaih mawk lo-in Pasian’ deihna leh thuman thutang tawh hong makaih nadingun thu i ngetsak ding phawkkhial kei ni. Thungetna in vaang nei-a, mite tha hatsak-in lam man tawnsak thei hi. I kumpi thakte cidam ludam takin hong omin hang tak leh man takin Pasian’ deihna bangin hong makaih theih na’ngun thu ngetsak tanghtangh ni, cih kong zawn nuam hi.
Pasian in kum thak 2016 sung Zomite thupha hong pia henla, i omna munmun-ah lawhcing-in ki-itna tawh kipumkhat dih ni, ci-in thu hong ngetsak-in ka thuzaksakna ka khup bawl hi.

Note hong it,

Sd/-
Rev. Dr. S. Pau Khan En
GZA Makaipi
Feb 9 2016