USA Zomite zattheihding Handbook kibawlsawm ~ Dr. Do Kham

USA Zomite zattheihding Handbook kibawlsawm ~ Dr. Do Kham

January 27, 2010 ni aa Zomi Innkuan USA EC meeting sung ah EC ii khensatna a om bang in, a sawtlo in USA Gamsung aa om Zomi te (a deuhdeuh in a tung thak te) ii phat tuampih ding vei na tawh Zopau in nisim nuntak na aa a theih huai a kisam pha diak thu tuamtuam te kaikhawm in “zat tangzang laibu” (handbook) khat ki bawl sawm hi. Hih project tawh kisai a makaih ding in EC te in kei tavuan hong pia uh hi.

A beisa kha 12 sung in USA gamsung aa Zomite lom om na mun 10 val ah ka va hawh thei aa, ih mipih te tawh Pasian bia khawm in, holim na leh dotna leh dawn na hun hoih hun nuam ka va neih pih kawikawi thei hi. Gamdang mun 5 te ah zong tuabang mah in hun nuam ka va ngaih thei aa Topa min ka khat hi.

Tua ban ah, 2009 sung in Kawlgam 3 vei kava ciah aa, Yangon, Mandalay, Kawlpi leh Tedim dong vapha to in Zomi tul bangzah hiam te tung ah Topa kamal Laisiangtho tawh hanthot na kava nei thei zel hi. Biakinn tuamtuam te ah hunpi mankhit ciang in, thu tuam tuam “dotna leh dawnna” hun ka neih pih zel hi. Tua ban ah nung aa October kha bei kuan in biakna lam maikai 500 val (pawlpi leh kipawl na 60 val pan) tawh Kawlpi ah ni 2 sung sun leh zan kizom in “Leadership for Organizational Effectiveness” (Kipawlna a Lawhcingsak Makaih na) cih thulu tawh tentan kava piak uh hi.

Tua ban ah, Siamsin te leh ZYA te makaih na tawh Zomi khangno 400-500 te ni khat bup tentan piak na leh holim na ka neih pih zelzel hi. Kawlgam ka va ciah sim in Tedim, kawlpi leh Yangon aa om Zomi kipawl na pan makai tuamtuam (Siamsin, ZYA, Tedim Association, ZOMUS) cih bang kipawl na tuamtuam pan aa makai te tawh holim na ka nei khawm den uh hi.

Tua te tung tawn aa ka phawk mahmah thu khat in, ih mipi te in, mailam ah ki pumkhat aa ih kalsuan khop theih ding lunggulh mahmah hi cih ka mu hi. USA gamsung leh Kawlgam bek hilo in leitung gam tuamtuam aa om Zomi Innkuan makai te tawh zankim zankhang dong in holim na leh kamkup na kava nei khawm thei kawikawi aa tua pen Pasian thupha hi ci in ih biak Pasian tung ah lungdam ka ko hi.

Zomi te din mun khen 4 in kamu hi.

Khen MASA (1): Zogam aa piang aa zogam aa luang kiphum ding mi tampi om (a tam zaw thamtham pen lokho singpua mi a hihi).

Khen NIHNA (2): Zogam pan kawlgam vai gam tung khin in, Zogam a kileh nonlo aa kawlgam vai gam aa a teng suak Zomi te.

Khen THUMNA (3): Gam thum na ah gambel in pai sawm aa Zogam leh kawlgam pan pusuak khia khin na pi in, a tup a sawm na gam tung nailo aa lamkal aa tawm vei sung a om lai Zomite.

Khen LINA (4): Tupna leh ngimna bang in gam thum na tung khin sate.

A tup a ngim bangin gam thum na a tungkhin ta a hih hang un, khantawn aa ih ten na ding gam ii pau leh ham leh ngeina te ih theih nailoh man in haksa a sa mahmah aa, a lungleng, a lung kia leh nasep ngah ding haksa a sa mahmah tampi ka mu hi. Tua teng ban ah, pau leh ham khat zong theilo pi in, ih it mahmah ih ta ih nau te Engish hiam ih omna gam te pau bek a kizat na sang te ah sang ih kahsak aa, naupang te in haksat na tampi tak tuak uh hi. Ih omna gam ii kumpi upadi (law) te ih theih nai loh man in, tuah loh dingpi haksa na tuamtuam a tuak aa sum tampipi a mawk bei sak mi pawl khat ih om hi.

Hi bang aa Zomi te din mun khen 4 te sung ah, Zogam aa om Zomi te leh Zogam khantoh na ding ih vei ciat uh hi. Ih sep theih leh ih sep zawh a tam nai loh hang in Khen nih na leh khen thum na aa om ih mipih ih sapih te haksat na te zong ih vei mahmah tek uh aa thu ih ngetsak uh hi. Tua teng sung pan, gam 3 na a tung sa te ii mailam nuntak zia ding tawh kisai in khat leh khat kigal bawl lo in, ki it diamdiam aa, khat leh khat tha kipia aa ki tawsawn ding a thupit na pen gen zawh hilo hi. A citawm mahmah ei Zomi te khat leh khat ki gal bawl in ki tawngtawng le hang ih khantoh loh ding ban ah, ih kim ih pam aa te in hong nuih san lel ding uh hi. Tua pen minam neu, a khangto lo te puak lungsim a hihi.

Zomi Innkuan kipawl na pen naupang mahmah lai aa, ih kipat na sawt nai het lo in ih sepzawh zong tam nai lo hi. Ki cin loh na leh ki puahphat na ding tampi ih nei hi. Zomi Innkuan USA bang in US kumpi tung pan Registration (matpongten) ih ngah na kha 7 bang a pha pan hi aa, kalsuan zia leh thukhun pi te zong damdam aa a puah toto ih hihi. Gam 3 na aa a teng Zomi te zong a innteek zo taktak om nai mel lo in, mi gam mi lei ah lengla bang in ih om lai aa, zan aa ih mang sung ah zong a tamzaw Zogam aa ih nu leh ih pa te mah tawh ih ki thuahthuah lai uh hi.

Zomi te pen ih muh na tangzai nai lo leh picing zo nai taktak lo ih hih man in, “tuni aa khaici tuh aa tuni mah aa a gah a at nuam te” ih hi uh aa, ni khat kha khat sung aa a gah ih nek theih nai loh ciang a lungkia leh midang teng a mawhsak nuam, ei mawh na leh tha nem na mulo in midang te mawhsak na ding a hanciam leh gensiat na ding lampi a zong nuam zong pawl khat ih om uh hi. Tua pen a khangto leh a picing te lungsim puak hi lo aa minam sung ah a khasiat huai, a lip khap huai leh a dah huai mahmah thu a hihi. Na Zomi pih khat na sim mawh aa na gensiat leh nang leh nang a ki sim mawh leh a ki gensia na hihi.

USA gam sung hi leh gam tuamtuam aa Zomi kipawl na te pen a picing zo ki om nai lo aa, ih sepnop mahmah na tampi ih semzo nai kei hi. Zomi te a lom aa gamdang ih tun pen sawt nai het lo a hih man in, ei tum tak in a khangto mahmah ih hi hi. Tua zah khat mah in ih mailam saupi om lai a hih man in, ki itna, thukhual na leh ki pumkhat na tawh kalsuan khawm ni. Ih Zomi pih khat aa ding in phat tuam na ih bawl zawh kei leh zong, kua mah sutuah lo in, thu ngetna tawh ki panpih tek ni.

Hih ih “Handbook” project tawh kisai in, nang mahmah mimal na hi zong in, na theih khak a lunglut mi a om leh hehpihna tawh kei hong contact un la, a kicing ziahzuah zo pah kei zong in, mipi te phat tuampih ding thu hi cih ka um hi. Hih ih project hoih tak aa ih zawh mengmeng theih na ding in thu ngen ciat ni. Mailam ah gam dang tuamtuam ah zong mipi zat theih ding leh phat tuam pih ding lampi tuamtuam zong in semkhawm ciatni. Zomi leh Zogam khantoh nading veina tawh no tawh mapang khawm, Dr. Chin Do Kham (President – Zomi Innkuan USA)