USA – UNO – Refugees ~ Pu Zokhai

USA – UNO – Refugees ~ Pu Zokhai

US Kiteel hunlaai-in “Ei’ ading Hilary Clinton Hoihzaw dinghi” kacih-pen ki-um lo-in, “Donald Trump-pen Christian-hi… huci., khaci…” cih tam mahmahhi. Trump-pen politics siampi khat hilo-in business siampi khat hi-a, sociology, social science, social study cihte asin ngeilo khat ahihi.

Tua ahihman-in amahmah-zong refugee (apu apa pan-a refugee) ahihlam aphawklo mi-ngong khat ahihi, ahizong-in US President hongsuak peetmahhi. USA, Canada, Australia, New Zealand, cihte-a English, Scandinavian,… cihte khempeuh Refugee ahihi.

Amahmah-zong refugee ahihlam kiphawklo ahihman-in USA leitang-ah apu-apa asuah man-in amah leitangnei kisa-in refugee-te mudah-in linhah-hi. Athu-in, Suah-Laaimun kuam-a Muslim refugee-te kawkna-tawh USA-in refugee laakluútna nasia tak-in khiamsuk-a, 20,000 pan-in 500-ah khiasuk giap-hi.

USA-pen thuneihna lam-ah UNO nangawn athuzawhkhum minamlian gamlian khat ahihman-in amau’ vaaihawmna mah-tawh UNO (UNICEF, UNDP, UNHCR, UNESCO…..) akalsuan pianpian ahihi. Adiak-in UNO hiangno UNHCR kalsuanna diakdiak refugee ala gamte’ lak-ahzong USA alianpen khat ahihi.

UN’ ading-in citpiak (donation) ahaátpenpen Arab Gamte hi-a, tua gamte Muslim gamte vive ahihi. Trump-in leitung nuntaák khuasakzia asinloh, atheihloh man-in refugee laakluutna hihbang-a hong saigawp ciang-in UN’ ading-a Arab gamte’ citpiak thakhatthu-in hongkiam-a, UN Convention-in lawmhsum kicing hongnei nawnlo-hi.

Tutung Malaysia gam-a Refugee vaái-pen Malaysia UNHCR lian-in thuneihna leh thusai theihna neilo-in Convention’ thupiak zuui-a akalsuan tawntung ahih-tawh kituak-in Convention-ah akicing budget omloh man-a gamnihna-a a-omlaai refugee te’ taangthu veelcian mengmeng-a refugee hih nading akisam thugui 5 lak-ah khatbeek-tawh akituaklo khempeuh siansuahna neiding cihthu ahihi.

Siansuahna-pen Malaysia-bek hilo-in India, Thai, Indonesia, Brunei-a kipan leitung munkhempeuh-a UN Sub-Office omna khempeuh-ah akibang-a hatsatna hongtung hi-a, hihpen Trump’s Refugee Crisis (minphuak pakni) ahihi. UN Sub-Office kim-a naseem nengnengte ataangpi-in refugee-te adeihsak vive hi-a, ahizong-in amau’ deihsak bek-tawh thute apiangthei hilo-hi.

Trump’s Refugee Crisis-pen USA – UNO – Muslim Countries – Refugees cihbang-in aki-paaikaan diimdiam ahihna hihteng cipak nihang!

Zomite’ Thumuhna Khan Hunta

Zomite-pen eima’ party ciang, eima’ community huam ciang-ah huumpi-neelkaai kitam mahmah-a, tua huamsung-ah politics asiampen, atheipen, anasiapen kitam mahmah-hi, ahizong-in ei’ party pualam, community huang pualam, sial-khekhaap pualam etna leh muhna-pen khaap-khat mahmah-zong khangkhaan naai tuanlo I’ hihlam ka-phawk mahmah-hi.

Atung-a “Donald Trump Tapidaw-hi” cihciang bekmah amu Zomite I-muhsa mah-tawh kituak-in, Malaysia-ah 2009 pan-in TOMCIK BEKBEK MUHNA-tawh aluteii zawdeuh khenkhat-in UN Appointment Card (APC) zuak hong kipan uhhi. Online-mah zangh-in naakpi-in ka-khaam hang-in genna tuamtuam-tawh hong kimang lo-hi.

Tua hun-in CRC, ACR, ZAM avekpi-in tuabang APC zuakna zehphi kimciat uh-a, tuabang kipawlna khatbeek-ahzong kihello-a mimal-a aluteii khenkhat inzong settawt teiitawm-a zuakna-a kipan kihhuai tak-in hong phulaam luapluap-hi. Tua hun-a azuakna-uh sumte tu-in beimang khinding-in ka-um mahmah-hi.

Sum-pen kigapna, zato zuatna, zatui leina leh guta sumsutte’ ziak-in tomkaal sung-a abei pakzal-thei sum ahihlam atheilo mihaii tengmah-in tuabang hongseem uh-a, tudong a-sum neilaai om nawn loding himahleh tua nasepna’ lawhsia-pen tudong kibuaipih-a, kibuaipih toto laai khading dinmun ahihi.

Refugee ala gamte-in hong hehpihlua-a hongla hi khollo-in, amau’ kiang-a naseemmi behlap, agam’ ading manpower behlap nading-a hongla hilel-a, Tapidaw I-sak mahmah Trump teekteek-in leitung politics tuihual atelcianloh man-in min kituakte khawngzong hong khaihsiang khalaai thei-hi.

Tu-inzong Zomi minam minpua kipawlna nengnengte’ kalsuanna-ah thu saupi ngaihsun hetlo-a, tutawm-a min, vaang, mun, ameet … ngahding etna leh muhna ciang-tawh akalsuan kipawlna tam mahmah-a, naakpi-in dahhuai kasa-hi. Zomite’ maailam-pen taangpha khollo-in, meiivompi kigaalmuh zawsop-hi.

Laaizom ngaihte-aw, tua ahihman-in:

• denmah ciang-a abeimang ziauding sum iiplah tentan kei in.
• denmah ciang-a mindaina na’ lawh lelding min/vaang deihlua kei in.
• denmah ciang-a hong kisuan khia veveding mun deihlua kei in.

Sum-pen ziingmeii bangbek hi-a, vengmang ziaulel thei-hi. Huih-in nahthel amuut bangbek hi-a, nangma’ khut-ah hongkhawl hunsung manpha tak-a na-zattheihleh mihampha na-hibek dinghi.

Min/Vaang-pen na-hoih sepna leh sil-pha bawlna bek-tawh zong lecin Vaan Kumpigam ciangdong na-kengthei dinghi. Tua lo-a zuauthu leh meeltheihthu-tawh min/vaang na-zon ngeingeileh mindaiina leh supna lianpi na-tuak peelmawh dinghi.

Mun-pen nang’ sang-a apilzaw leh asiamzaw hongkhan sim-in na’ mun hongluah lelding ahihlam thei inla, iiplah tentan kei in, banghanghiam cihleh nangma’ mun-ah “Sing omlohna-a gua akizangh” na’ hihlam theilel lecin na’ van zaáng zawkaan ding-a, na-tawldam zawtham dinghi.

Saupi en inla, buiipi leikeii mahbang-in khua ngaisung tawntung in! Laigelh, Hong It, Na’ Laaizom, Zokhai