USA ah Kawlgammi khatin numei khat guksawm, buansawm, teenpihsawm ahih manin kiman

USA ah Kawlgammi khatin numei khat guksawm, buansawm, teenpihsawm ahih manin kiman

US, Georgia State sung aom pasal khatin numei khat guksawm, buansawm, utlopi in zawhthawhthu tawh teenpihsawm ahih manin palik te’n man uh cih Fox59 News pan kizahi. A numeinu pen Johnson County pan hi a, anumei utlopipi in zawhthawh thutawh gamtatsawm cimawk hi.

Tua pasalpa minpen Kung Bik Cem kici a, kum 19 aphakhin khat ahihi. Georgia State, Tucker City sung aom hi a, “Rape, Criminal Confinement, Theft” cih tengtawh akiman ahih manin athuakding pen baihlo khading hi.

Court Document pan aki zakna ah Kung Bik Cem in tua numeinu pen Facebook tungtawn in hopihzel, laikhakzel cihi. Tuabangin numeinu nawngkai sakden in, kaki zopnoploh hangin hong koihkhonglo hi ci’n numeinu in palik te kiangah genkhia hi.

March 24 ni in tua numeinu pen asanggampa tawh Indiana, Southport aom meltheih tanau te mopawi khat asimding in pai uhhi. Tua mopawi ah apai atheih ciangin Kung Bik Cem inzong aomna panin delhpah vingveng hi.

Kung Bik Cem in hopihpih in SMS khawng khakkhak himahleh numeinu in thukkik nuamlo hi. Facebook tungtawn in akithei khabek hi a, apualam ah khatveizong kimu ngeilo uhhi.

Tualeh Kung Bik Cem pen mopawi ah hongtung takpi in numeinu tawh akimuh uhciangin a phone pen suhsak in piakik nuamnawnlo hi. Banghangin hong hopih nuamlo nahiam, na phone sungah kuatawh kizom cihte ennuam ci’n alaksak hi a, nong ngailaihiam cihzong theinuam ing cihi.

Mopawi amankhit ciangin numeinu in Kung Bik Cem pan in a phone alak kiksawm ciangin, pianuam tuanlo a, mawtaw sungah hong hopih nuam ing, nongzuihlehbek hong piakikding cihsan hi.

Mawtaw sungah alutkhit phetin Kung Bik Cem in taipih vingveng a, inn ah hong ciahpihding hi’ng, hong teenpih ding hita ing cihsan hi. Numeinu pen apusuahsawm hangin phalvetlo hi.

Tuaciang in numeinu inzong mawtaw hawlna Steering Wheel letsak in I-65 Southbound lampi tungah mawtaw akhawlsak nadingin Gear pen letcipsak gawp hi.

Tua ciangin Kung Bik Cem inzong mawtaw khawlsak a, numeinu pen mawtaw anunglam tutna tungah buansawm hi. Hong gaisakding hi’ng, tua hileh nong nusiathei nawnkeiding a, ihki teenloh phamawh dinghi ci’n buan kipatsawm tinten cimawk hi.

Tualaitak in palik Trooper Joseph Malone in tuakkhalian in, numeinu pen awnggawp in, taikhiatsawm amuh ciangin buaina om cih ummawhpah hi. Anaihphei ciangin Kung Bik Cem pen akawnggak suahkhia in, a pasal zahmawh zong apualam ah suahkhiakhin in abuanding lianin numei ii atungah akithawi mukha hi.

Officer pa’nzong Kung Bik Cem pen numei tungpan kaikhiat in akhut kol bulhsakpah hi. Officer pa genna ah kol kabulh khitciangin numeinu pen lungnop tuakpahhan cih kamu ci’n genkhia hi.

More: Kawlgam ah 2017 January khakhatsung bekbek in Rape Case 100 val om

Kung Bik Cem tulaitak Johnson County Jail kici thongsung ah kikem ci a, “Rape, Criminal Confinement, Theft” cihteng tawh mat athuak ahih manin athuak kikding pen baihkhollo khading hi. ZD Sawltak #zomidaily