US Zomi te & ZAM ~ Pu Zokhai

US Zomi te & ZAM ~ Pu Zokhai

USA Homeland Security, UN Convention: Geneva, UNHCR Malaysia, Thailand, India, UNHCHR, Malaysian Government hihte-ah nungkum-in Petition Laimaai 125 leh Zomi min malsim tuul 8 vaal akipuakna sung-ah Zomi leh Chin Kidanna (Distinction between Zomi and Chin) kiciantak-in kipulaak-hi.

Zomi leh Chin atuamtuak hi-in Deputy Vice President Van Thio leh Chief Minister of Chin State Maj. Hung Ngai te’ thu-zong kiciantak-in akipulaak ahihi. Tulaaitak US-ah Zomi khenkhat interview kisam-in dotna tuamtuamte’ lak-ah “ZAM na-thei kha-hiam?” cihzong kihel-hi.

US Homeland Security Dept.’ hong dawnkiikna tumah-in kaveelcian takciang-in, “Nong’ information piak ka-thupilaak mahmah uh-a, hoihtak-in ka-veelcian ding uhhi” hongci uhhi. Laiphah-pen “ZAM-tawh seemkhawm-in ZAM’ tawsawnna-tawh kong gelhhi” ci-in support letter kician-tawh akipuak ahihi.

Tua hi-in, Zomi-pen Chin-tawh kidang mahhiam or tua hilo-a sumbawlna company khat-hiam cih thei nuam-a dotcianna “Zomi Association of Malaysia-in Zomi Refugees’ ading seem taktak-hiam” acih thei nuam-a hong kancian hiding-in ka-lamen mahmahhi. Min kibang leltak-bel CRC, ACR, TCM cihte-ah asuuk mahmah hilel ahihman-in anuai-a bang-in dotna na-dawng ciat un:

ZAM na-thei kha-hiam?

Dawnna: Thei mah-ing. Chin Refugee Committee-in Zomite naakpi-in hong nawlkhiin man-in Zomi-in Zomi gaaltaaite komding huaiding-a akiphut Ka’ MINAM KIPAWLNA ahihi.

Nang’ tung-ah bang hongbawl uhhiam?

Dawnna: Minam kipawlna ahihman-in pawlmisuahna leh kumsum (membership fee & annual fee) hongla uh-a, aliam abaai, asi amang omleh vaáiteng hawm uhhi. UNHCR-ah ngetna laiphahte hong gelhsak, hong puaksak, UNHCR pan-a information te mipi’ tung-ah hong taangko uhhi.

Zomi naupangte’ laisin hun amawkbei loh nading-in ZEC Dept hong uh-a, NGO te-tawh pangkhawm-in Zomi Saangkahna mun tampi-ah phut-in, naupangte’ social & psychological wellbeing naakpi-in tawsawn-hi.

Hong dotbehleh Spiritual & Cultural Wellbeing’ ading-in Pupa’ Ngeina Khuado, Zomi Nam Ni cihte mipi kaaikhawm-in bawl, mipi kilawmtaat nading-in Chinese New Year sim-in ZAM Cup hong makaih-in Soccer Team 20 vaalden-in kimawl ziahziah…..

Hihteng-tawh nadawng ciat un. Kuamah patau kei un. Appointment Card zuak, min kitaih-tawh kisai dotna a-omleh:

Na’ min mi’ min hilo-hiam?

Dawnna: Ka’ min-mah ahihi.

Hiah na’ min kibatpih om veh-e:

Dawnna: Kawl gaalkaap kihtaakna-tawh min taktak nangawn apia ngamlo tampi-zong omhi. Zomi sung-ah min kibang tam mahmahhi. Khua kidang min kibang thamlo, khua khat nangawn-ah min hoihte-pen akibang 3 leh 4 omden lel-hi. First and Last name lelbel Zomite’n neilo-in ka’ bawltawm ciat uhhi.

More: USA – UNO – Refugees ~ Pu Zokhai

Min kitaih-tawh kisai hilozaw-in “Zomi Minam himah-hiam? ZAM-in Minam Kipawlna-mahhiam?” cihthu akancian-uh ahihi, banghanghiam cihleh UNO leh US Homeland…. cihte-ah Refugee Affairs laiphah khempeuh ei’ a simloh Chin min vive-tawh ahihman ahihi.

Hihpen Trump-tawh akisai hilozaw-a, Trump-tawh kisaibel refugee-intake cut off hizaw-hi. Zomi Tawldam Un. Zokhai