US White House gei ah mikang palik teng athahsawm pasal khat kiman

US White House gei ah mikang palik teng athahsawm pasal khat kiman

US White House geinai ah mikang palik “White Police” khempeuh athahlupsawm pasal khat kiman cih Fox News pan kiza hi. Tuapa minpen Michael Arega kici a, USA gamsung Texas State aom Dallas khuapi pan ahihi.

Monday ni in Washington, D.C. aom kumpi innpi White House ah pai in, mikang palik khempeuh thatlumding cih asawm laitak in akiman ahihi. Hihpa gamtatsawm vaitawh kisai in Secret Service Protective Intelligence Division te’n nitaklam 3pm madiak in zakna nei uh cihi. Montgomery County Maryland Police Department te’n azaksak kici a, tuahang in Michael Arega kicipa apaiding pen encikpah uhhi.

U.S. Secret Service te ii Statement pulakkhiatna ah hihpa pen Texas State pekpan in Washington D.C., White House aom mikang palik teng thatlumding cih ngimna ngiattawh aki thawikhia cimawk hi.

White House angak acing akem in aom Secret Service te’n hihvai azak ciangin zongpah ngeingai uhhi. Pennsylvania Avenue lamsang aom Lafayette Park geinai panin ki mukhia in, kimanpah hi.

Tuaciang in Metropolitan Police Department te kiangah ki puakpah in, bangci bangin thu kibawlding cihpen aki ngaklai ahihi.

Michael Arega in Facebook tungahzong gelhkhiat nei a, Monday ni inzong White House ah “checked in” ci’n suaksak hi. Tuaban ah Social Media tungtawn mahin lai gelhkhia a, tu’n White House ah kapaiding a, mikang palik teng ka thatlum dinghi “Now i am going to there to white House make sure kill All white POLICE !!,” ci’n gelhkhiamawk hi.

President Donald Trump ii alimzong Facebook tungah suaksak in, Zeisu mintawh that un “Kill Him in JESUS NAME !!” ci’n gelhkhiamawk hi.

More: White House sungah Bomb kapau aci mawtaw tawh alutsawm khat kiman

Michael Arega pen akimat laitak in ama pumpi tungah hiamvan “Weapon” bangmah puak neilo a, ahi zongin mithatding vauna “Felony Threats” tawh thu kibawlding cih kiza hi. White House pen migilo, mi ngongtat te’n mitsuan in neigige uh a, abeisa inzong atuamtuam in lauthawng sakna tuamtuam omngei zelzel hi. Sawltak #zomidaily