US kumpi in maikumsung Refugee mi 110,000 laksawm

US kumpi in maikumsung Refugee mi 110,000 laksawm

US kumpi in hongtungding maikum *Fiscal Year sungin leitung muntuamtuam gamtuamtuam pan Refugee gambeel mi akigawm in 110,000 lakzawh nading in hanciamsawm uh cihthu Senior Obama Administration Official panin zanni Wednesday ni in genkhia uh cih Fox News pan kizasawn hi. Abeisa kumkhatsung in mi 85,000 bek lakding geelna anei uh hi a, tuatawh tehkak ciangin 30% bang akhanto uh ahihi. (azahthum hilo)

Hihbang in US kumpi in Refugee tampi alakbehsawmna uh ahang ahihleh Syria gam, Iraq gam leh Afghanistan gamsung te ah tualgal nasia mahmahlai ahih manin, tuate ahehpih manun US gamsung ah Refugee tampi alaksawmlai uh ahihi.

Hihzah alaksawm nangawn zong Right Groups pawlkhat in tawm salualai uhhi. Banghanghiam cihleh Europe gamsung bekbek ahzong abeisa kumkhatsung in Refugee mi 1 Million bang kibehlap cimawk uh a, tuatawh a etkak uhciang in tu a US kumpi laksawm 110,000 pen Right Groups te’n ahawmthawh uh ahihi.

Refugee mi 110,000 lakding cihpen kha 12 sungin alakding uh hi a, tuapen maikhasung in akipanding hita hi.
(*Theihding: US gam ii Fiscal Year pen October 01 nipan kipan a, September 30 ni ciangdong ahihi)
Abeisa kumkhatsung ahih keileh kha 12 sung alak uhpen mi 85,000 hi a, tukha beileh Fiscal Year abeiding hita hi. Abeisa kum 3 sungbangzong US gamin kumkhat in Refugee alak uhpen mi 70,000 tabek ahihi.

Abeisa kumsung in Syria Refugee pawlkhat in Europe gamsung ah buaina tuamtuam piangsakmawk uh ahih manin, hih Refugee te lakdingvai zong gamlian te patau veve uhhi. White House inzong hih Refugee Program pen gamsung a nawngkaisaklo ahihding leh National Security alinglawngsak ahihloh nading hanciamsawm mahmah uhhi.

Lamkhat leuleu ah US kumpi in maikumkhat sungin Refugee mi 110,000 bang alaksawm uhhang in Syria, Iraq leh Afghanistan gam te pan tualgal thuaklah in ataikhiate ahehpihman uh cimawk ahih manin Malaysia aom Refugee te hongbanzodiam cihkhat lunghimawhhuai leuleu hi. ZD Sawltak #zomidaily