US Kitelpi & Stimulus bill Latest Update: January 03, 2021

Breaking news, US Kitelpi & Stimulus bill Latest Update: January 03, 2021

1. US kitelpi ah athupi pen ni khat ahi January 6, Congress Join Session ah final certification bawl ni in election result nial in electoral votes leh certification pen “objection” bawl dingin Republican Senators sung pan aminthang leh atal tak mahmah te ahi Senator Pu Ted Cruz (R-TX), Pi Marsha Blackburn (R-TN), Pu Steve Daines (R-MT), Pu John Kennedy (R-LA), Pu Senator Ron Johnson te aa kipan R Senators 10 te in objection bawl ding officially in genkhia ta uh ahi manin January 6 ciang hong buai in vai lianpi hong piangkhia ding in kigen tek ahi hi.

Abesia hun in US Senator lak pan Pu Joshua David Hawley (R-Missouri) in “Objection” ka bawl ding hi ci in official tak in amasa pen genkhia masa ahi hi. Republican House Representatives atawm pen 134 ten zong objection bawl ding taangko khia khin ta aa, Congress ah debate akibawl theih nading offical aa ataangko khia Senator khat leh House pan khat ta bek akisam hi in tu in tua sang azah tampi tam zaw ta ah hi. US gam ii asang pen Court ahi Supreme Court na leng in alanglek in thu te khensat uh ahih man leh kitelna ah thu manlohna te Congress in limtak sit nuamlo ahih manin hi ciang hong tung to hi ci uh hi.

Abeisa hun te en kik leng Congress Joint Session ah 1969 leh 2005 kum in zong hi dan in objection kibawl ngei khin aa, vote kila ahihi. 1877 kum in Congress in Electoral Commission phuankhia in Senate leh House ah President leh Vice-President ding debate bawl in vote kikhia kik in Election result kilumlet khin cih taangthu om khin ahi hi. Tua 1877 Electoral Commission ah Senate pan 5, House pan 5 leh Supreme court pan 5 te kihel in thu khensatna nei uh hi.

January 6 ni ciang electoral votes leh certification result pen objection bawl hi uh leh:

1) Objection hong kipsak uh leh Pu Biden pen President-elect ah hong kip thei nawlo, hong hi thei nawnlo phot ding ahi hi.

2) Congress (House & Senate) ah debate hong kibawl kik thei dingaa, vote hong kila kik ding uh ahi hi. Abeisa hun te ah Senate in Vice-President ding vote kik uh aa, House in President ding vote kik uh ahi hi.

3) Congress in Electoral Commission cih hong phuankhia thei dingaa, kitelna ah thu manlo khempeuh leh election fraud akici khempeuh hong kankhia, hong sittel khia kik ding uh ahi hi.

4) Congress in khensat na hong nei kha zen zen in objection abawl te lam pan gualzawhna hong ngah kha hi zen zen leh Pu Trump in States pawlkhat ah hong zo kik thei dingaa, President hong sem suak thei ding ahi hi.

5) Objection bawl te lam pan a lelh uh leh belh Pu Biden pen President-elect in hong kip to suak suak ding ahi hi. Atungaa thu te pen piang leh piang lo ding cih te pen Pasian deihna hi dingaa, ama khut sung ah om cih i phawk sa tek hi in ei mihing lam pan apiang thei thu te i ngelh khiat na ahi hi. January 6 ni ciang bang teng hong piang ding cih ngak tek ding, i et tek ding ahi hi.

2. Stimulus payment $2000 khan ding vai tawh kisai Congress in tudong ciang khensat lo uh ahih manin Mipi te lungkim hetlo uh aa, California aom Democrat makai Pi Nancy ii Innpi leh Kentucky aom Republican makai Pu Mitch McConnell te Innpi te kisuk siat sak (vandalized) gawp uh ci uh hi. Mipi ten belh $2000 tuciang dong i ngah loh pen amau te geel hang hi ci in mawh sak uh ahi hi.

$ 2000 khan ding vai lian belh Pu Trump in mipi te deih sak na tak tawh hong thu sun khiat hi aa, Congress ah a awk cip phot ahi hi. Congress ah Senators leh Representatives akitel thak teng kiciamna hong neih khit uh ciang “Congress new session” thak ah hi vai kikup kikna kinei ding ahih manin, mipi ten ngak toh toh lai phot ding ahi hi. $ 600 zong direct deposit pan atamzaw in ngah khin ta uh aa, angah nailo ten zong tu nipi sung in ngah ciat ding uh hi. Hih vai tawh kisai Dotna leh Dawnna (Q & A) zong behlap to to lai ni.

3. Democrat makaipi Pi Nancy Pelosi zong 117th Congress thak ah House speaker dingin a 4 neina ki tel kik leu leu aa, tuni kiciamna nei khin ta hi. House Speaker ding aki vote na ah ama D party lam pan pawlkhat in nial in a deih lohna uh pulaak khia uh in ngah kik lo dek tak hi ci uh hi. Abeisa hun te ah R makai lam te leh Pu Trump tawh kilem het lo ahih manin mipi te in akideih khawl nawnlo ahi hi. Tua mah bangin R makaipi pa Senate Majority leader Pu Mitch McConnell zong mipi ten kideih khol nawnlo ahi hi.

4. House ah Republican pan agol pen ahi House GOP Minority Leader Kevin McCarthy (R-Calif.) in zong January 6 ni Congress Joint session ah Electoral College Vote Challenge ding leh objection bawl ding ka thukimpih aa, ka panpih ding hi ci in genkhia ahih manin January 6 ni pen hong nopci thei ding ci uh hi. Senate ah R lam makai Pu Mitch McConnell leh makai pawlkhat ten a panpih loh uh hang objection bawl ding Senators te mi kicing mahmah ta lel ahih manin ki patau nawnlo hi ci uh hi.

5. Abeisa January 02 ni in Vice-President Pu Mike Pence in zong Congress ah Electoral college votes pen objection bawl ding ka “welcome” hi ci in genkhia aa, Vice President Chief of Staff Marc in thu suahsak na nei hi. January 6 ni Congress ah joint session akibawl ciang Vice-President Mike Pence pen “President of Senate” ahih manin “electoral votes certification” bawlna ah Hun-uk (Chairperson) in hong sem in hong makaih ding ahi hi.

6. January 6 ni Congress ah Joint session akibawl lai tak mah in Pu Trump apanpih ten Washington D.C, White House ngei teng ah “Mega March” lungphona neih ding ngel uh aa, mi tampi kihel ding geelna nei uh hi. Tua hun lai mah in Pu Biden lam apanpih D lam ten zong lungphona nei kha ding uh aa, kibuai thei kha dinguh ahih manin mipi lam pan kipatau mahmah hi.

Tua hi aa, tua ni ciang Washignton D.C sung i vak leh kidop ciat ding ahi hi. Bang bang hi ta leh hih US kitelpi bangmah buaina lianpi om lo aa, hoih tak hong man siang meng meng theih nading thu ngetna tawh panpih ciat ni. Update bawl to to ni… ** Hun i ngah leh LIVE tung ah kimu tek ni. Ref: Fox News, Epoch Times, OAN, New York Times, Thomas On Sian Mung (Thomas Mung Guite) Washington D.C January 03, 2021 MOMNO Media & Museum