United States in galvan honpikhat Saudi Arabia gamte zuakding uh khentatna neikhinta uh cih Pentagon in Tuesday (09 August) ni in genkhia hi. Hih azuakding galvan lakah Tank galdo mawtaw 153, Machine Guns honkhat leh galvan tuamtuam kihel a, avekin US$1.15 Billion manneiding cihi.
Hih taangkona Announcement akibawl leh Saudi Arabia te makaih galvanleng in Yemen khuapi akap tawh ahun kituak a, mi 14 in sihlawh hi.
State Department spokeswoman Elizabeth Trudeau pen hih galvan kizuakvai hangin lunghimawh mahmah ci a, US gamin hih galvan te azuakna hangin khuasungmi tampi in asihlawhding patau mahmah hi.
Defence Security Cooperation Agency (DSCA) te genkhiatna ah US State Department in hih galvan kileiding vai phalna piakhin a, Congress ahzong Monday ni in zaksakna neikhin uhhi. Congress in hihvai tawh kisai ni 30 sungin khaamna neithei uh himahleh tuabang in nawngkai sakloding in ki lamen hi.
Hih galvan te hangin Saudi Arabia in agamsung aom galvanzak te apuahpha ahihban ah agam uhzong hoihtak adalzawh nading hiding hi ci’n DSCA in Statement ah genkhia hi.
Galvai omleh aki phamawhlah US mah, galpiannading in thauvui thautang azuak kawikawilah amaumah kici hiauhiau venmaw, hih galvan hangin daihna hongpiangzaw takpidiam? ZD Sawltak #zomidaily
Comment piaknop aomleh...