US gam Georgia State sungah thau kapna piang, mi 5 si, 2 liam

US gam Georgia State sungah thau kapna piang, mi 5 si, 2 liam

Georgia State sung, Atlanta khuapi naihuai lamah thau kikapna piang ahih manin mi 5 in sihlawh cih thu Fox News pan kiza hi. Saturday ni in Douglasville Subdivision sungah thupiang hi a, innkuansung kitotna pan buaina piang ahihi.

Atlanta pan 20 Miles a gamlatna Douglasville Subdivision pan nitak nai 3pm pawlin 911 aki zaksak ciangin Police te’n delhpah uhhi. Douglas County Sheriff’s Lt. Glenn Daniel in agenkhiatna ah hih apianna munpen inn dawlnih aneikhat hi a, thautawipa in azi ahingei ex-wife leh atate aphialkap cihi.

Tuabang in akapkhit ciangin thautawipa pen amahleh amahzong ki kaplum a, asi mi 5 banah adang naupangneu 2 zong liamgawp cih kiza hi.

Thautawipa ii a innkuanpih te ki zasak nailo ahih manin thautawipa amin apuam pen ki genkhiathei nailo hi cihzong tuahun laitak in Lt. Glenn Daniel in genkhia hi. Aliam naupangno nihte pen anai aom Hospital te ah amanlang in ki puakpah hi.

Hih nupa kikal thupen bangmah ki theician nailo a, banghun in nupa aki khenhiam cihzong ki gencian theinailo cihi. Lt. Glenn Daniel in genkhiatna ah “ka nasepzawh kum 20 sungbang hita a, hizahliang in gamtatsiatna ka mitmuh cilna ahihi” ci’n lamdang asakna genkhia hi.

Aveng apam aom te’nzong cihna pakding atheihloh uhhangin huhtheih bangin aliam abai te huhngeingai uh a, Rescuer Team te hongtun mateng buaipih mahmah uhhi. Pawlkhat aki kaplum te pen innsung ah hi a, pawlkhat te innpua lamah aki kaplum ahihi.

Innhuang sungteng “Crime Scene Tape” akici Palik te khau kikhung zengzang a, kumpi thunei te’n velcianna neilaiding uh cih thuhoihlo khat kizazel hi. ZD Sawltak