US galkap te’n Afghanistan gamsungah MOAB Bomb khiatsuk

US galkap te’n Afghanistan gamsungah MOAB Bomb khiatsuk

US galkap te’n Thursday ni in Afghanistan gamsung aom IS te omna ngimin MOAB Bomb tawh kap uh cih Pentagon in genkhia hi. MOAB Bomb akici pen “GBU-43/B Massive Ordnance Air Blast” aki tomlawhna hi a, Nuclear Bomb lobuangding in galkidona ah alianpenpen Bomb khatin aki ciamteh ahihi.

US President Donald Trump inzong Afghanistan gamsung ah MOAB Bomb tawh US Military in akapna pen gualzo mahmah “very, very successful” ci’n genkhia hi.

Tua MOAB Bomb in Afghanistan, Nangarhar Province sung aom Achin District sung kapkha hi ci’n US Forces Afghanistan te’n Statement ah genkhia uhhi.

Air Force spokesman Colonel Pat Ryder inzong agenkhiatna ah hih GBU-43/B MOAB Bomb pen gal kidona in akizang Non-nuclear Bomb lakah alianpen hi ci’n genkhia hi.

Pentagon Spokesman Adam Stump in agenna ah hih MOAB Bomb pen vanleng “MC-130 Transport Plane” tawh akipua cihi. Thursday ni Afghanistan Local Time 7pm hunpawl in aki khiatsuk ahihi.

US Forces Afghanistan ah amakaipipa ahi General John Nicholson inzong hihpen Afghanistan gamsung aom IS te gamtatna adaihtuam nading leh gamsung kepcingna in hih MOAB Bomb tawh akikap hi ci’n genkhia hi.

MOAB Bomb pen “Mother of All Bombs” cih Nickname tawhzong kitheizaw a, US in Iraq gamsung ah gal ado hunlai 2002 – 2003 kumin akibawlkhia ahihi. 2003 kumin sinna Test kibawl himahleh galdona taktak ah kizangngei ngailo hi.

Hih MOAB Bomb ii agihna bekbekzong 21,600 Pound (9797 kg) tak gik a, Bomb lakah alianpen leh Nuclear Bomb lobuangding in alauhuai penpen khatin akiciamteh ahihi.

More: US kumpi in Syria gamsung “Tomahawk Missile” thaupi tawh kap kipanta

US galkap te’n Syria gamsungzong Tomahawk Missile thaupi tawh kapkhin uh a, tu’n Afghanistan gamsungah MOAB Bomb khiatsuk leuleu uhhi. North Korea tawhzong buaina tuamtuam tampi kizaza khin a, Nuclear Bomb khawng hong zatkhakding uh patauhhuai mahmah hi. ZD Sawltak #zomidaily