US Federal Judge te’n Trump in gambeel te dalna dingin Executive Order asuaikaih uh dal

US Federal Judge te’n Trump in gambeel te dalna dingin Executive Order asuaikaih uh dal

Jan. 2017: US President Trump in VISA kician nei gambeelte nangawn khen tuam loin kilutsak lo dinga, a gam tek uh ah sawl kik ding hi ci-in executive order suai a kaih manin US federal thukhen (judge) ten pawl khat dal (blocked) uh hi. Federal judge ten Muslim gam 7 – Syria, Sudan, Libya, Yemen, Iraq leh Somalia gam panin US ah gambeel dingte Trump in ni 90 sung lutsak loh ding hi ci-a Trump in executive order suai a kaih pen thukhenna innpi ah hek (legal case bawl) uh hi. US District Judge Ann Donnelly in tua bangin Trump in gambeelte lutsak loh ding a dal manin US airport tuamtuam ah mi kiman in kikem (detained) a, lunghimawhhuai hi ci-in zan in gen hi.

American Civil Liberties Union (ACLU) in zong Trump in gambeelte lutsak loh ding a cih “class action lawsuit against the ban” kici thukhenna innpi ah hek uh a, US Federal judges ten hih bangin Trump geelna a dal uh pen gualzawhna hi ci uh hi. Federal judge ten Trump’ geelna a dal manun a beisa bangin gambeelte kilutsak thei lai dinga, kuamah a gam uh-ah kipua kik lo ding hi ci-in ACLU’s Immigrants’ Rights Project deputy director Lee Gelernt in ci hi.

Iran professor khat zong Trump in suai a kaih manin Boston’s Logan Airport ah kiman a, kikhah khia kik ta hi. ACLU in VISA nei mi 100-200 kikal Trump in executive order suai Friday in a kaih khit nung US airports mun tuamtuam ah kiman hi ci hi. Iraq gam panin phalna lai nei nih zong John F Kennedy International Airport (JFK) ah kiman a, tua hangin legal case (hek ding) sawm uh hi. John F Kennedy International Airport (JFK) bek panin mi 12 kiman ta hi. A beisa nailal 24 sungin Homeland Security ten khualzinmi 109 lutsak lo uh hi.

Trump in executive order suai a kaih manin Muslim gam 7 panin green card neite nangawn lut theihna ding dal hi. Trump in hih bangin suai ka kaih manin American mipi “terrorist” suamna (attacks) tawh kipelh thei bek ding uh hi ci hi. Trump in bel hih bangin gambeelte lut ding a kidal hangin biakna hanga bawlsiatna thuak minam tawmte (minorities) kilutsak dinga, adiakin Christian bawlsiatna thuakte kilutsak masa ding hi ci hi. Iran in zong Trump’ executive order thuk kikna dingin US mi peuhmah Iran ah kilutsak lo ding hi ci hi.

More: 2017 kum Tax Return tawh kisai theihding thu ~ Khawm Pau

Canadian Prime Minister Justin Trudeau in zan in biakna khat peuhpeuh ahi zongin biakna hanga bawlsiatna thuakte Canada ah kimuak ding hi ci-in amah maan leh Toronto airport ah Syria galtai naupang khat a muakna maan tuangsak in a Twitter ah “Diversity is our strength #WelcomeToCanada,” cih tuangsak hi. Source: Al Jazeera and news agencies/ Thang Khan Lian