Upna tawh ka kalsuanna ~ CS Khai

Upna tawh ka kalsuanna ~ CS Khai

1994 kum in Tansawm (High School) A tawh ka zawh ciangin, Pasian hongsapna tung tawnin Laisiangtho sangkahin Pasian na sepding ka khensat hi. Sangkah na dingin Mizoram ah sum ka thalawh hangin tua sumte sangkah na ding in a cingzo ding hi deksuai lo hi. Pasian in Moses, Joshua te kiangah na khe in na sikna mun na gam kong suaksak ding hi, ci a hih manin ” ki sinding, kalsuan ding” ci in upna tawh sangkah dingin bang mah keng mello in Falam, Zomi Theological College ka va tunghi.

Miten sangsum pia ziahziah in Uniform lei na ding pia ziahziah ta mah leh, khuakhal lama, guahtui hongpai ding ih ngak lah bangin Pasian vanguah ngak tha pai in, ka om hi. Sumpiak zawhloh na hangin, siate in tamveipi zum sungah hong sam uh a, maizumna tamveipi om hi. A hi zongin ka lungsim sungah hong suak khat om den a, Hongsam pain hong nusia lo ding, tu laitakin sum ka piakzawhloh hangin, a hun ciangin hongpia sak zo veve ding ci in, upna ka nei hi.

Ni taksim in Pasian kiangah thumna leh tauna tawh thu ngen in, ni le kha, kumte hong beiciangin Pasian in hong sik in B.Th. 1999 kumin ka na zo thei hi. Pasian kiangah, ” God, you are never late, but nearly late” ka ci hi. Topa aw, ziakai ngei kei teh, a hi zongin ziakai dektak teh ka ci hi.

B.Th ka manciangin phazota hi. Haksa pipi in sangkah kul nawn kei ci in, sangkah ding peuh mah ngaihsut in ka neikha nawn kei hi. A hi zongin Kawlpi ah ZCLS meeting ka vakah ciangin, mi khat in Laisiangtho sang kahbeh ding gupna thu genbangin hong genpih hi. Ni tak 1, nitak 2 bang hong genpih hangin, sum neilopi a, sang zopding ka lungsung ah hong suak zolo hi. Ka ngaihsun zo kei hi.

A hi zongin, a ni tak 3 na ciangin ” Topa thu ka dong hi. Topa aw, sumneilo pi a, na thu sin beh ding, hong ki genpih thapai, na deihna om a, nang hong sawl thapai ahi hiam?” ci in thu ka nget le, Pasian in B.Th na kah lai a, hongsikpa, Jehovah Jireh na theih lai hiam? hong cih ciangin, hi mah ei Topa ci in, Pasian muanna tawh sang zopkik ding ka khensat leuleu hi.

2000 kum a kipan in MIT, Insein, Yangon ah M.Div. sin ka ki pan hi. Pasian muanna liuleu bek tawh, sangkah ding a, ki pai himawk a hihmanin haksatna tampi om hi. Nitak sim mahin Pasian ka to den hi. Topa aw, na thu sinbeh ding nong deihsak ahih leh a sumding, sponsor ding hongpia masa ve, ka ci hi. Pasian thusin ding sangkah ding takpi, sum le paai bang mah kenglo a, ka paiciangin, lamkal ah, ka tha hong nem mahmah a, Rev. Job Thawngno kammal kawmpak leng, Abraham in a tapa Isaak tawh Pasian biakpiakna neidingin Moreh muallam a zuattawh ki bang ka kisa a, lam ka pai kawmkawm in, kuama muh loin, ka khitui lamdungteng ah a kia hi.

Tua bangin ka paipai leh cidam in M.Div.ka zopna ding MIT, Insein ka tung ngawngaw thei hi. Insein, MIT ka tunciangin ka sum bawmsung ka et leh Ks. 200 lai dal khat na, na om lai hi. Ka sum neih bukpi hipah hi. Midangte, a diakdiak in ih sanggam Kachin te, sangnau pang a, theihsa, sumbawl, suangbawl mihau te bangin sum le paai pua zihziahin, zang ziahziah zo uh a, mi hing tektek, Pasian na sem tektek hampha diak si uh e, ci in ka eng mahmah hi.

MIT ah Falam sangkah laimah bangin Upna bek tawh kalsuan ka hihmanin, lai haksat, sum haksat in nisim in lummeibangin hongtuam den ahih manin, maitai zawhna dingin, ni hong suak ngeilo tawh kibang hi. MIT, Insein ah Sum le paai beitam a, Upna tawh kalsuan theih lohna sangpawl ahihmanin, haksa ka sa mahmah hi. Ka lupna tungah khitui luangin thu ngenin Topa ka hopih zel hi.

Sum le paai haksa ka suak luat ciangin, Pasian ka to zel a, na khempeuh nang a hi ci in, na kammal in gen ah, nang a hitakpi le kong ngetnate hongpia ding hi cin a, ka ci thei zel hi. Haksatna sungpan in Pasianin gualzawhna ni le khate hong mu sak hi. Ni le kha te hong bei toto a, Pasian in a misiang tho te zangin, sang man nading in vai hong hawmsak hi. Cidam tak le lungkim huaitak in M.Div. ka zo thei hi.

2006 kum in Holland gam (The Netherlands) ah M.Th (Cross-cultural Theology) sinding in ka pai thei hi. Pasian in na khempeuh hongsik a, sum le paai haksatna bang mah ka tuak kha kei hi. 2009 kum a kipan The University of Hamburg ah Dr. Theol. Program sin theihna ding Topa mahin vai hong hawmsak a, sum leh pai haksat na bangmah tuaklo in tu niciang dong sang ka kah thei hi.

Pasian in a lamdang takin hong sik ahihman in Pasian tung ah lungdam ka koh ciangin, Laisiangtho sangkah ding ka kipat lai, ka ki thawidan te ka lungsim mitkha in mu thei zel a, Pasian hang bek ahihna ka phawk hi. Upna lo tawh kua mah in Pasian lungkimsak zolo hi, Lstho in a cih mahbangin, Pasian lungkimna in, Amah ih up ngeungau na ahihi. A hi zongin, UPNA ih cih, ei hamciam zawhthu tawh a ki neizo hilo zeel a, Pasian mah in hong neihsak ciang bek a, a ki nei theipan hong hi kawikawi zel hi.

Upna tawh kalsuan na hangin Pasian hongpiak lamdang thuphate pawl khat hong ki gelh a hihi. Hi bang thu a ki gelh ciangin ki phatsakna, kisak theihna le, kisialhnop man hi lo a, Upna tawh kalsuan na hangin, a ki ngah Pasian hongpiak thupha te pawl khat a gen nuam ih hi zaw hi. Lungdam, CS Khai (Bochum, Germany)