UN Khawmpite akah dingin Tangmi Sapna

UN Khawmpite akah dingin Tangmi Sapna

Zomi Innkuan USA Kipawlna in UN ECOSOC Phualpi ah Consultative Status ngah ahih manin, anuai a UN tawh kisai Khawmpite ah Tangmite puakin kikahsak thei hi. 2014 kum a kipan, kumsim in, leitungbup mun tuamtuam a om Zomi makaite, mipil misiamte, uliante, palaite, madawkte, tanute kicial a, ZIUSA Kipawlna min tawh UN Zumpite ah Khawmpi akah dingin kipuak hi. Kipawlna Board of Directors pawl in, ahong tung ding 2018 kum sung inzong ZIUSA Kipawlna min tawh UN Zumpite ah Khawmpi tuamtuam, Thukikupna tuamtuamte akah dingin Tangmi puak dingin kikhensat hi.

Zomi Innkuan USA Kipawlna min tawh UN Zumpite a kibawl ding anuai a Khawmpite akah nuam, anuai a dinmunte tawh akituak Zomi-te in a hun lap-in Tangmi dingin Ngetna Laipi ahong puak dingin muanna leh lam-etna tawh kisam hi.

UN Khawmpite

1. UN ECOSOC Youth Forum (#2030) – UN Khangno Khawmpi 2018

• A Ni : January 30~31, 2018
• A Mun : UN Head Quarters, New York, USA
• A Thu : https://www.un.org/ecosoc

Tangmi dingin Ngetna Laipi puak ding ni nunung ni: December 24, 2017.

2. UN CSW62 – UN Numei Khawmpi

• A Ni : March 12~23, 2018
• A Mun : UN Head Quarters, New York, USA
• A Thu : http://www.unwomen.org

Tangmi dingin Ngetna Laipi puak ding ni nunung ni: January 7, 2018.

3. UNPFII17-2018 – UN Tualsuak Minamte Khawmpi

• A Ni : April 16~27, 2018
• A Mun : UN Head Quarters, New York, USA
• A Thu: https://www.un.org/development

Tangmi dingin Ngetna Laipi puak ding ni nunung ni: February 25, 2018.

Tangmite (Representatives) Dinmun

1. Zomi Innkuan USA Kipawlna min tawh UN Khawmpite kah nuamin Tangmi (ZIUSA Representatives) hihna angen Zomi-te sung pan Board of Directors Pawl in ateel teengbek kipuak ding hi. Tuaban ah, Board in ateel Tangmite sung pan UN Zumpi in ahong sansak Tangmite bekmah Khawmpi kah thei ding hi.

2. Tangmi (ZIUSA Representative) dingin Kawl gam, Vai gam, Tuipi Galkhat a om Zomi-te sung pan kingen/kiteel thei ding hi. Khua leh tui kipawlna tang’in ahi zongin, Political Party tang’in ahi zongin, Minam kipawlna tang’in ahi zongin, Sang buppi tang’in ahi zongin, Mimal thu tawh ahi zongin Tangmi (ZIUSA Representative) dingin kingen thei ding hi.

3. Tangmi (ZIUSA Representative) ding peuhmah in Khawmpi sung a kizang English kam atel thei mi hiding a, Khawmpi tawh kisai thu leh late ahilhsawn thei tangmi kician hiding hi.

4. UN Khangno Khawmpi akah ding Tangmite pen khangno kum 35 aval hilo ding hi. UN Numei Khawmpi akah ding Tangmite pen a tangzang, amah leh amah vai ading zo Numei hiding hi. UN Tualsuak Minamte Khawmpi akah ding Tangmite pen Gam leh Minam avei Zomi hiding hi.

5. UN Khawmpite akah ding Tangmi peuhmah in UN Zumpi a omna New York khuapi a kuanna a ciahna ding, Khawmpi hun sung zinbuuk sapna leh annek tuidawn akipan vaksuk vaktohna dingin akisam sum leh paai pen amah leh amah a kisik zo hiding hi. ZIUSA Kipawlna in siklo ding hi. (Theih ding thu: Abeisa hun in ZIUSA Kipawlna in Khawmpi hun sung teng Tangmite zintunna ding Hotel kisapsak hi. Tu tung a Khawmpite tawh kisai in Board of Directors pawlin vaihawmna kinei nailo hi.)

6. US Gam sung pan ahilo, Gamdang panin ZIUSA Kipawlna min tawh UN Khawmpi akah ding Tangmite in US Visa angah theihna dingin ZIUSA Kipawlna in Zumlai bawlsak ding hi. Gamdang pan akuan Tangmi peuhmah, Khawmpi aman ciangin a Gam ah ciahkik hamtang ding hi. Gamdang pan akuan Tangmite US Gam sung teng ah ama thu tawh suakta takin kizinsak thei ding a, ZIUSA Kipawlna in US Gam sung a khualzinna vai hawmpihlo ding hi.

7. ZIUSA Kipawlna min tawh UN Khawmpite akah ding akipiakhia Tangmi peuhmah in Zogam leh Zomi a’ding in ZIUSA Kipawlna tawh khut kilen a, itna leh deihsakna takpi tawh ma apangkhawm nuam mi kician, mi muanhuai Zomi ahi dingin kilam-en hi.

Tangmi (Representative) Ngetna

Zomi Innkuan USA Kipawlna min tawh UN Khawmpite akah nuam peuhmah in anuai a Thute, Tangmi Ngetna Laipi sung ah kicing takin khumin, akiciangtan Ngetna Laipi puak ding ni nunung ni lap-in anuai a Tanupi tung ah kipuak thei ding hi.

1. Full Name (First/ Middle/ Last), Date of Birth (Day/ Month/ Year), Male/ Female, Single/ Married

2. Address, Telephone, Email

3. Name of Organization (Kipawlna tang’in akah nuamte), Position (Panmun), Officials (atheihpih)

4. Education (Laitan), Experience (Gam leh minam, khua leh tui a’ding nasepnate), Projects (Mailam Mabante)

5. Name of UN Conference (UN Khawmpi Thu), Objectives (Mimal/ Kipawlna Lunggulhna)

Theih ding: A tung a Tangmi Ngetna Laipi sung a Thute siksan in Board of Directors pawlin Tangmi teel ding a, a kiteel Tangmi peuhmah in ZIUSA Kipawlna tung ah kamciam bawl ding hi.

Tangmi Ngetna Laipi puakna ding (Email / PDF File):

• Pa Gosawm Khup
• Director of UN Affairs
• Zomi Innkuan USA, Inc.
• GSKhup [at] ZomiInnkuanUSA.org

Zogam leh Zomi atawisang zo ding, Minam Mabante ah ma apang zo ding Zomi makai ulian mipil misiam palai tanu madawk nungak tangvalte Zomi Innkuan USA Kipawlna in itna, zahtakna, lam-etna leh muanna tawh hong kimuak hi.

GSKhup
Director of UN Affairs
Zomi Innkuan USA

December 9, 2017
Tulsa, Oklahoma, USA