UN in gammi hihna neilo te abeisiang nading in kum 10 sung hanciamding

Leitung gamtuamtuam ah mi 10 Million bangin gammi hihna Nationality neilo uh a, cimawh dongtuak genthei gambeel in om uhhi ci’n UN Refugee Agency in Tuesday ni in genkhia hi.

Tuabang in leitung ah gambeel mi 10 Million bang aomkhin kawmkal ah Minute 10 simin gambeel mihing khatta kibehlap cisawnsawn hi. Gambeel sungpan Minute 10 ciangin khatta suahbeh cihna ahihi.

Leitung ah “Stateless Person” atam semsemna tawh kizui in UNHCR in “I Belong” cih Campaign khat nei uh a, leitung gamtuamtuam te in athukhun uh enpha in, gammi hihna aneilo te atawmsemsem nadingin hanciam uhhi.

Tulaitak adiakdiak in Palestinian mite Stateless tammahmah hi. Ahi zongin UNHCR te muhkhiatna ah leitung ah Stateless People atampenpenna gampen Kawlgam hi ci uhhi. Kawlgam sungah Rohingya Muslim te Myanmar Nationality kipialo ahih manin Stateless Person atampenpen ahihi ci’n UN Refugee Chief Antonio Guterres in genkhia hi.

Hih Rohingya mite pen Kawlgam kumpi in a ngaihsutna ah Bangladesh gampan in honglutphei ahih manin, Kawlgam ah Legal tak in omtheiloding ci in mu uhhi. Tuamah bangin Bangladesh gam kumpi te’nzong hih Rohingya mite pen Kawlgam panin amau gamsung ah Illegal Migrants te ahih manin gammi hihna ki piatheiloding ci in mu uhhi.

Tua ahih manin hih Rohingya mite pen UNHCR te muhna ah mi hehpihhuai mahmah hongsuak uh a, Priority pia in adonphatdiak mite hongsuakta uhhi.

Leitung ah gammi hihna aneilo gambeel mi atawmsemsem nading in UN in kum 10 sung hanciam mahmahding uh cih kiza hi. ZD Sawltak