Ukcipna leh kizop kikawmna

Ukcipna leh kizop kikawmna

Dictatorship ki-ukzia a kici Communism, Fascism, Socialism cihte ah communication hoihlua leh mipi in thu theibaih, thu kizabaih ahihman in ki-ukcip zolo hi. Tua ahihman in mipi’ khantohna leh khuamuhna, pilna leh ciimna a hithei zahzah a mekcip theihna ding in communication peuhmah nakpitak control kul a, a hoihlo theithei ding a a vaihawm uh akul ahi hi.

Tuahang in Newin’ hun sung Socialism tawh ki-uk Kawlgam ah tuitung, leitung, vantung leh huihlak kizop kikawmna peuhmah ahoih a gina khat beek omlo hi. Newin’ hun beikhit galkapte’ ukcip hun sung mahmah in zong leitung khantohna khamzawh dalzawh ding hilo theihsa gige hi napi, galkap ukpite thuneihna nuai ah fax, telephone a kipan internet, email, facebook/ social mediate, viber/ whatsapp cih communication tools khantohna pen nakpitak control uh ahihman in kiziakai mahmah hi.

Mite in hih communication hoih tungtawn in khantohna leh hamphatna bangzah om cih theitel lua mahmah uh ahihman in a hoih semsem ding hanciam in thapia uh a, mi tampi mah in hauh lawh, nopsak lawh, khantoh lawh, pil lawh, siam lawh himah leh enbel i muhna a tuampi khat hilai hi.

A hoihna tampi a om mahbang in a zangkhialte’ ading in zong siatna lam ah tunbaih mahmah bel hi bilbel hi.

Bangbang ahi zong in leitung lehpei ni ci ihih kei buang leh hih khantohna lehkaih zawh ding thu hilo a, khaktan theih ding thu hilo ahihman in zatloh ding kigen a kikham bawl sang in zatdan ding kihilh a kimakaih ding lunggulh huai zawtham ding in ka um hi.

Dictatorship kimakaih zia zui in, Mite’n eisang thu a theihzawk khak ding, a pilzawk khak ding i patauh a mekcip, khaktan leh kham ding i hanciam sang, amau sang a pilzaw, a theizaw toto ding in en na hanciam lel lehang hoihzaw ding hi.

Tua pen mikhempeuh ading in meetna leh hamphatna a piangsak hizaw ding hi. Pau Khat Suan