U Thun Myint gen a naupa gambuplutang (General) U Thein Sein thu tomcing

U Thun Myint gen a naupa gambuplutang (General) U Thein Sein thu tomcing

Kawlgambup lutangpi U Theinsein upa ahi U Thun Myint in “hong pai ding kiteelna ah a sanggam pa damlohna hangin gambup lutang dingin kidem kik dingin um nawn kei ingh, a kum zong tamta in Biakna lam ah a kipiak ding hun ding zong tamlua nawnlo hi” ci’n Japan thuthang kannu MaIhNiChi Shinbon tawh homlimna aneihna tungtawn in genkhia hi. Kum 75 bang a phata U Thunmyint in ahih le a teenna Ngapuhtaw inn aa holimna neihna tungtawn panin a gen ahi hi.

Tukum sung akibawl ding ahi gambup kiteelnapi mipi te teelna ngah Hluttaw in gambup lutang ding akitel pha ding ahi hi. U Thein Sein kitelna ah demkik ding maw, demkik lo ding cih akician in genna zong omtuan lo hi. Gambup thuneilam te le sumbawl pawlkhatte in bel U Theinsein kitelna ah a kidem kik nading kuo uhi.

U Thein Sein in aneih a tanute thum losiah ah a nungta lai a sisan kibatpih, laigui zom sitset pen U Thun Myint bek neilai hi. Gamdang thuthang kan ahi MaIhNiChi Shinbon tawh a holim laitak un galkap lam te le gamsung thukansim (songthauh) te in zong encik uhi.

U Thein Sein pen kum 18 a phak in Bo sinna (DSA) sangah kah in a khangno lai hun tamzaw pen galdona tawh bei hi ci’n amah sang kum 5 aa a upa zaw U Thun Myint in gen hi. “Ka naupang cidamna tawh kisai lunghimawh pih mahmah ing. Gamsung gamlak ah tam om zaw ahih manin nattun natna zong vei hi. Lieutenant General ah a za khankhit zawh hunsawtvei pi avei lungtangnatna (chronic heart desease) hangin a lungtang in na hoihtak sem nawnlo ahih manin lungtang ah set (pace maker) thuah in tua tawh a nungta ahi hi ci’n zong U Thun Myint in dahmai pua kawmsa in gen hi.

Irrawaddy gamke, khuano khat nuntak a hamsa innkuan pan le gammang tulak sai hangte kawmkal panin a hangkhia uh ahi hi. A innkuan un biakna lam hahkat mahmah pawl hi uh a, a nu nusiat khit zawh a pa uh pen phunggyi lut in biakna lam ah kipia khia hi. A nulepa bangin biakna lam ahahkat, a kipiak khiatna uh hangin amau unau zong Pasian in thupha tampi akhangsawn donguh hongpia ding hi cih ka um hi ci’n zong gen hi. U Thun Myint in a naupa U Thein Sein pen “aneih lai anuntakna a beima in biakna lam hahkat in, mite aading thupha tampi tak bawl dingin zong ka lamen hi ci hi.

Kawlgam mipi 90% bang Buddha piakna zui ahihna tawh kizui in amau upna le kihilhna ahi nuntak hun beikuan, kum tam khit zawh ah biakna lam hahkat dingle kipiak khiat ding pen thupi sak uhi. U Thein Sein in ahih leh gamvai pan in ka khawl ciang, Letaw inn ah om in lokho nasem kasem ding hi ci ngei hi.

Kawlgam galkap ukna a beikuan ah Prime Minister za tawh galkap sungah a lianpen lina galkap bo khat zong ahi hi. 2011 mipi ki-ukna tawh kalsuan kipat ciangin zong gambup lutangpi hong hi leuleu hi. Galkap kumpi hun sungin a lianpen thumna akici Thura Shweman demkheng in gambup lutangpi mun angah zong ahi hi. U Thura Shweman ahih leh tulaitak in Pyituh Hluttaw ah lutangpi ahi hi. Galkap kumpi hunsung in a makai le a zalianpen Senoir General Than Shwe in gamvai pan a tawlngak khit ciangin a innkuanpihte bit nading ngimna in U Thein Sein pen a zaluah dingin a tel hi ci’n zong U Thun Myint in gen hi.

A neulai thute uh U Thun Myint in a genkik ciangin “U Thein Sein pen a dik hichiat, a dai khipkhep khat hi. Gambup lutangpi mun dong a za akah tona hangin tungsiah uliante tungah itna, zahtakna a neihna hang le cikmah hunin a thu a nialkik lohna hang zong ahi hi” ci hi.

U Thun Myint i inn ahih leh sikkang kikhuh sing inn khat ahi lel hi. Lengla khan ah plastic (fibre) tutphah te kikoih in aircon cih zong omlo hi. U Thein Sein kiangpan in a ngah letsong in ahih leh mobile phone khat bek ahi hi ci’n zong gen hi. Hih thu in ahih leh Unau, innkuan, phung sung, bawngsung a thupisak golhguk nekna a tampenna gam khat aading in a lamdang thukhat zong ahi hi.

U Thun Myin in anaupa thu zong hi bangin genlai hi. “Kum 5, kum 7 a phak dong sing akisui thauno tawh kimawl den hi. Tua bek mah lunglut in nopsa mahmah hi. Khua ah tan 4 sang om ahih manin tua sang ah tan 4 dong mah kah in, a 2na, a 3na pen ngah den. A 1na bel ngah kei. Maths, science le Kawllai bang lim hahkat phadeuh hi. Tua hunlai in ko manglai hong kisin sak lo hi. Ka pianna khua uh ahi Congkuu khua pen inn 300 apha Pathein khua i nitumna lam ah aom khuano khat ahi hi.

“1948 kum gambup suahtakna ngah khit zawh ah ahong piangkhia tualgal te hangin mun khempeuh ah thau om hi. Khua khat le khua khat pen tai 1 pan tai 3 khawngbek kigamla in Karen gal, Communist gal te pankidal nadingin kumpi galkapte tawh kakizom uhi. Thautawi gal te khua sung on glut theiloh nading un khuasung mite in kumpi tungpan huhna ka ngah uh a, tua huhna te tawh ka nang uhi. Tua lai bang hi leh ka naupa pen a ma sing thau tawh akimawl mawl leh thau takpi na ngawn amu ngei a lawngkha ngei ahi hi. Tan 4 a zawh ciangin Pathein khua ah tan 5 kah hi. Kei zong tua sangmah ah tan 7 ka kah hi. Tual gal hang a kei pen sangkah a zekai ka hi hi. Ka nulepa in ka unau vua sang kakah uh ciangin hamsa sa uh ahih manin kanau khua ah samkik in kumkhat sangkhawl sak uhi. A kum kik ciangin bel khua dang khat a ka pano te inn ah om in tua pan tan 6 kah hi. Tan 7 a zawh ciangin Pathein sangpi ah zomto suak hi. Kei bel tan 10 zo zolo kahih manin sang tawp ingh.”

“Ka nau pen sang a kah lai Volley ball bet ut mahmah hi. Tukpeng zong sui thei zel hi. Sang a volley ball teltuam sangnaupangte lak ah zong kihel hi. Niangtuisai tut, chess kimawl cih khawng uk kei. Aman sim gamlim khawng suai den zawpian hi. Pathein khua ah laibusaal 2 om a, tua teng ah zong laibu minthang (Kawllai a akiletkikte) le galsimna tawh kisai laibu te sim phadeuh hi. Boyoke Aungsan thu zong kanin sim hi. Neu lai akipan amahleamah kikem zo mahmah hi. Zatep, zudawn cih a hoihlo gamtat te cikmah hun in sem ngeilo hi.”

“Tua hunlai in tan 10 akah laitak hi in, kum 18 acin loh hangin Bo sinna sang ah lutkhuan kivuan thei hi. College kah ding cileng lah sum neihloh na hanmah tawh Bo sinna sang ah lutkhuan a va huan leh ongpah ahih manin galkap sung a lutthei pah ahi hi. Bo sinna ah kum 4 a kah khitciangin BA-DSA lukhu nelkai tawh kumpinu nasem ong suak hi. Sang akah lai in gamlim suaih uk ahih manin galkap sung ah asep ciangin zong nop sa mahmah hi. Tua hun lai in gambup mun citeng ah gal om kawikawi ahih manin a nuntak lai zong a kampha cih ding ahi hi. Ka nau pen kum 18 aphak akipan galkap sung lut hi a, tun ahihleh kum 70 bang phata hi.”

“Tan 10 ka kiat ciangin khua ah ciahkik in nulepa nasep ka huh hi. Ka nu le na unu in niangtuisai khat hong uh a, khauhsuai le mohhingga zong kazuak uhi. Ko lam ah bel ngaben mah kilim sep pen hi. Ka pa in ahih leh ngakeu pho na guapek te pawl in ngabeng te a zuak kik hi. Ka unu mei pen kei sangin kum 5 in uzaw hi. Kei ka hih leh ka nau U Thein Sein sangin kum 5 in ka upa zaw hi. Ka u numei ahih leh nungakpi hisuak in tawl cancet tawh hong nusia khin hi.”

“Ka nau ahih leh noble prize angah phial zongin a veina (feeling) na ngawn agenkhia loding pawl hi. Gam khantoh nading bek a lungsim ah koih hi. Galkap sungah vai thupi pawlkhat pen imcip dingin kihilh hi. Tua hi a gamvai tawh kisai ko unau bang kikup, kiho cih om kei. Azi le a tate zong genlo hi. A man bang sem cih zong ka dong kei a kong ka theihpih kei hi.”

“Amah bel gim ta ding hi. Kum 18 aphak pek a galkap sung lut hi in, kamphatna tawh a nungta pawl ahi hi. A lutung aa apo a samte a pulh mang phial zong na a semsem ding mi khat hi. Galkap sung ah nattun a vei lai in a siklukhu suah khia leh bang a samte a lomlom in pulh khia mawk hi. Amah bel tawl mahmah ta in teh. A sam na ngawn om khol nawnlo mawk hi. Galkap sung ah annek manlo, gamlak ah singgui peuh, singteh peuh anek hun uh zong om hi. Amah Lt. General ah a za hong khantoh ciangin a lungtang ah set (pace maker) tat in anungta ahi ta hi. Tua khit zawh a lungtang zong ahoih nawnlo suak hi.”

“Ka pa un a zi neihma kum 3 sung khawng mah phunggyi na lut ngei hi. Ka nu uh asih khit ciangin amah asih dong phunggyi sungah lut suak hi. Tua ahih manin kapa biakna lam kipiakkhiatna, hahkatnate hangin ko a tate pen Buddha biakna um mawkmawkte ka hi kei uh a, a dangte sang biakna hahkat zawte ka hi uhi. Midang te sangin zong angsung lungsim, huaihamna lungsim ka nei kei zaw uhi.”

“Ka nau in tanu 3 nei in, a vek un zong kumpi nasem himang uhi. Aman bel a ahauh nading nasem lo hi. Zing an, nitak an gilvah in nezo peuhleng aci pawl hi in huaiham lo hi. Amah pen a neih bang tawh lungkim lel in zong golhguk nesim lo hi kici thei hi. Amah le amah kikemcing zo hi. A tungsiah uliante zahtak in cikmah hunin a thu nial cih om ngeilo hi. Kei zong hong zahtak hi. “

“Ko pen Buddha Biakna umte ka hi uhi. Tua ka khansung un na hoih ka bawl uh le, mai ka nuntak kik uh ah na hoih ngah ding cih ka um uhi. Nidang aa na hoih nasep nate hangun, tun na hoih a ngah ka hi uhi. Tua kacih pen leitung thute ahi hi. Biakna lam thu pen tun akipat ding hunta hi. Hun tam nei nawnlo hi. Sumbawl na lam tawh kisai ahih leh bel bangmah ngimna geelna nei kei. Na tawlngak khit ciang sumbawl na khat peuhpeuh sem ve kacih leh, na lung himawh kei in hong cih san. A pension zong kicing khin ta hong ci ziau hi. “ ci’n Kawlgam bup gamlutangpipa U Thein Sein i upa U Thun Myint in gen hi cih thu MabiNichi Shinbon in thuthang ah suaksak kik hi.

Zingsol thupuak
January 9, 2015
Credit: The ladies News Journal