U Thangbawi (Sia Pau Cin Thang) lungzuan sialna

U Thangbawi (Sia Pau Cin Thang) lungzuan sialna

U Thangbawi, pilna leh thutheihna-tawh zaitak-a minam itpa ahihlam thei-in thupisa mahmah-ing. Ka’ tangvaalno laai-in ka’ lungsim hongkhoih mahmah-a ka’ sinlaai-ah vaáibang athaamden khat-pen:

Lai Siangtho saáng akahna-ah asiapa-tawh open discussion nei-in, asiapa-in U Thangbawi’ quote-pen um phalo-a a-om ciang-in, “Author, Pub-Year, P.no., Bookshelf no.” teng gen-a, asiapa-in saángnaupang dangte ensak-in MAAN sitset takpi ahihman-in “Kawlgam-ah hihbang khuak omthei-maw” ci kici-a, tua-in ka’ tha hong lawpsak mahmah-in U Thangbawi-pen ka’ role model thupi mahmah khat ahihi.

Minam itna-ah piicing mahmah-in Zomi Nam Ni thute asuutna English-tawh hitaleh Zolai-tawh hitaleh kimsak zihziah-in upmawh gelh ngeilo, reference kiciantak-tawh gualbaán tak-a laigelh asiampenpen khat ahihi. English-tawh ama’ laigelhte academia.com pan-in kisim theidenhi.

Zolai laimal gualzia, laigual lamzia, laimal kopzat leh tangzat cihte-zong Zomi sung-ah U Thangbawi zah-in abuaipih leh hun manpha apiazo midang (ka’ zawlpa J. Thang Lian Pau ahihkei buangleh) kuamah omlo dinghi cih kiptak-in ka’pulaak ngamhi. Abuaipih dangte-in panmun leh min neuciliklik ngah ahihman hi-a, tua nangawn U Thangbawi zahlang dong-in citaklo, itna neilo vive hi-uhhi.

Zolai thupisak-in Englishte nangawn-in asintheih ding-in akhilkhia, agualkhia Zomi paukam (language) a-it mahmah U Thangbawi-tawh maáitang kituah-in holungkum khawmding ka-geelgeel hang-in tu-in amah-in hong paisan tahi.

Adah-akap nulehpa, ulehnau, lawmlehgualteng-tawh keimah-inzong lungzuan kasial khawmhi.

U Thangbawi, Zomite’ Ngalliam Khat na’ hih gige lamtak Nangmahmah inzong na-theikha kholkei ding-a, Zomi ahau Alian tampite’nzong Ngalliam-in hong seh khollo khathei mahdinghi. Ngalliam taktak-pen mihau miliante-in siincip-in vut leh vaai-tawh vukcip nuamzaw denhi.

Lunghiang kei in, Ngalliam Taang Zomi-aw! Na’ zuatna tuanglam-ah tawldam-in Thangvaán Tualnuam tuang vatung inmaw! Minsial, N’ong it, Taang Zokhai