Tutung mimal dinmun ~ Bob Tuangpi

Tutung mimal dinmun ~ Bob Tuangpi

Tutung bel kei akikal ah ( neutral) sawmmai ing. Kum-5 sung ASSK zongh theihkhin, kum-5 sung-5 USDP zongh thei khin, pute pate ban ah tukhang hunsung galkapte’zia thei khin in lawp nading le gen ding kammal neikhollo mai hing.

Ahizongin mipite in ih makai ding Democracy kalsuanzia tawh ih teelcing kumpi khutsung pan gambup thuneihna mungpi -3 teng thumanlo zuauthu tawh abuluh thaumuuk/thatang hat suang galkapte le apawl teng thukimpih ngiatlo-in asang pen mawhpaihna ka pia hi. Amanlang thei pen akhahkhiat ding uh pello akisam thukin cih ka pom hi.

Thukhat ah bel kuakua in bangbang agen zongh 1974 U Thant vai buaina, 1988 buaina, 1996, 1997 buaina le 2007 buainate pan thu tampi kisin thei hi. Va kibual kha vanglak leeng lah ki uang lua in cin kei le kei ki control zaw ing.

Sangkahpih minam tuamtuam khangno meltheih honpi khat mah in hong hopih in deihtak panlaak ding hong zasak tampi om mah hi. Tua ban ah tutung buaina vai pen 2020 kiteel dungzui aa kumpi mai kum -5 sung 2008 thukhunpi nuai ah kalsuan ding cih himawk hi.

Alangkhat ah 2008 thukhunpi kip tetek nading lampi hibilbel hi. Tua bel ei mualmite in deih hetlo hi-hang! Tua ban ah mai kum -5 sung tutung gambup teelcing Party in kumpi ong sem kik mah leh zongh 2008 thukhunpi ciingduaipi mah tawh ong zep zel lel ding ban ah galkapte in tu aa dan mah aa a ut hunhun vua thuneihna mungpi thum teng buluh den keii lel ding hin kei’dinmun le ih mualmite’ dinmun tawh kituak ka sa kei hi.

Tua teng bilbial kawmkal ah galkapte’ ngimna/political road map & political agenda ka khinkhai teh tutung buaina pen vai lemzo-in um keng.

Alangkhat leuleu ah gambup teelcing Party makai lamte’ dinmun ka et teh tutung mipi lawhcing zenzen mah leh zong Hluttaw sung pan 2008 thukhunpi puah zawh nading lampi mutuanlo ding ban vuah, tua kantan nading akician lampi sialna/political agenda nei hetlo uh cih tutung akalsuanzia uh ah kitel sinsen hi.

2008 thukhunpi ii piaktheih hamphatna le thuneihna ciang bek tawh ong nitum pihpih lel ding dan uh ahih teh kei mimal dinmun ( Political view) ah akikal ah om ding ka kizo hi. Hibel Democracy dan aa suaktatak keima mimal dinmun hi a, hivai ah eimah mimal khat ciat kizawhna leh dinmun ahih ban ah suaktatak thutuam kaitheihna ( Agree to disagree) mikim in anei ihihi.

Hiciang dinmun akitunna pen alangnihtuak makaite in buainate kikum khawmin vailem nading geelna a omlohna hang hipi pen hi. Alangkhat tuak ah ding tekin eima panna tek aman pen hi cih makai khat le nih sialkhau kisuhna pan hong piang khia hi a, taangpi taangta in akithuak dikdek zeel ding ahihi.

Kawlgam gamvai buaina khempeuh ih etkik tak ciangin minam khat le khat, kipawlna khat le khat kizahtak tuakna ( Mutual respect) omlo-in alangnihtuak ki thupi simna ( Mutual recognition) a omloh ziak hipi pen hi. Azote in aguallelte luzang ah mei-amsa buakin akhe uh tawh tuanciil nuam den ahih manin khat le khat kimuanna ( Mutual trust) a om zo nawnlo himai hi.

Tua teng hang mah in azote in zoden ding, aguallelte in thuak den ding cih tawh kikalsuan mawk aa, vekpi alangnihtuakin meetkim ding ( Win – win political solution) a omloh thaman agah tudong gambup le taangpi taangta in akithuak toto ahihi.

Bangbang ahita zongin Democracy ading le gambup mailam khualna tawh akipiakhia mapang kumpi nasemte, biakna nasemte, khua le tui makai upa makaite le tualsung taangpi taangta kipawlna makaite akipan khangno numei pasal, nupi papi le piteek puteek aciangciang aa mapang khempeuh thupi ka sa aa, zahtakna sang pen ka pia hi.

” Bang hang gambup milip million 50 val mipite le gambup mailam ding ka khual uh hi, aci alangnihtuak makaite in hiciang dinmun hong tunpih mawk uh hiam!” – Bob Tuangpi ( 0140202021)