Tutung kiteelna tawh kisai GZA pan tangkona

Tutung kiteelna tawh kisai GZA pan tangkona

Pasian hehpihna tawh tutung Kawlgambup kiteelpi nuam takin a kizo suak hi. Kawlgam a America te ambassador pa Derek Mitchell in acih mah bangin gambup kiteelna khat a om ciangin koi gam koi gam hi taleh deih bang sinsen cih pen a om lo mah hi. Tutung kiteelna pen Kawlgam buang dingin ahoih mahmah cih ding hizaw-a, thu-um mite thungetna Topa hong dawnna zong hi ding hi.

Amasa in tutung a teelcing Zomi taangmi khempeuh GZA panin kong lungdampih uh a, pahtawina leh zahtakna zong kong pia uh hi. Teelcing lo te zong na hanciamnate uh kong ciaptehsak uh hi.

GZA in tupna nih nei-a, Zomite kipumkhat ding leh abukim khantohna neih ding ahi hi. Kiteel hun laitakin party khat leh khat kidem in kitawng kisel kha phial ding hihang. Tua pen kiteelna khat peuhpeuh a om ciangin angeina hi-a, lamdang lo hi. Democracy gam lianpen America gam tektek ah zong kiteel hunin khat leh khat kitawng in, kisel in, kiko ziahziah lel uh hi. Ahi zongin, kiteelna aman ciangin pumkhat suakkik uh a, gam aa dingin semkhawm, pangkhawm uh hi.

Tua mah bangin, tu-in kiteelna manta ahih teh Zomite zong i kipumkhatkik ding thupi mahmah hi. Mipi i hi a, makai te ihi zongin, kiteel sunga thute gen kikkik nawn loin mainawt ta ding hihang. A zote zong zawhsiamin, alelte zong lelhsiam ding kisam hi. Kidem laitakin atuam dang dankhat in i om hangin i vekpi in Zomi mah ihi hi. A kikhen thei dingte hilo hihang. Abeisa hunin hehna, thangpaihna i neih leh zong tuate khempeuh mangngilh in Zomi leh Zogam aa dingin khut kilen in na i sepkhop hun ding hong tungta hi.

Teelcing taangmite in hong tung ding kum nga sungin aituam meetna bang teng ka ngah ding hiam, cih ngaihsun loin Zogam leh Zomi ta dingin acihtak bang ka sem thei ding hiam, cih lungsim tawh i kithawi ding zong i kihanthawn nuam hi. NLD makaipinu Daw Aung San Suu Kyi in,”Teelcing taangmite bel hong phat nai kei ning. Mailam a na nasepna uh tungtawnin phattak leh phattak lo na hihna uh hong kilang pan ding hi,” acih mah bangin teelcing cih ciang bek hi loin na manpha asem zo a teeltak takpi mipi taangmi ihih ding thupi zawlai hi.

Atawpna ah, Zomibup in i makai ding teelcing taangmite i hih theih zahzah in panpih in tawsawn ciat ding hihang. Gensia in langpan cihte peuhmah zat ding hilo hi. Zomite Pasian um vive ihih mah bangin i makaite thungetna tawh panpih tawntung a tha i piak ding zong i kihanthawn nuam hi.Khazih leh Zomite sungah,

Khazih leh Zomite sungah,
GZA Central Committee