Tunnu’ itna ~ Tdkhen

Tunnu’ itna ~ Tdkhen

Wales gam-a meingong nu khat, zankhat a tapano a cina in gim mahmah hi. Zankim laitak-a siavuanpa vaphot ding pen maingap het lo hi. Ahizongin a tano lah mu thei nawn hetlo zel ahihman kithawi-in khuamialpi sungah siavuanpa a va zuan ta hi.

Siavuanpa in zong, “Zankimpi-a pai dinga, meingongnu inlah sum neilo dinga, naupang lah hong damin lianto mahleh sawtpi hong hidinga, ka pai zongin kei’ aadingin meetna om hetlo ding ahi ve maw” ci-in a tavuan/duty ahihna hang’ bek tawh mit nuai nainai in nupi-nu va zui a, tua naupang a va dam sak ta hi.

Hun hong pai toto in tua naupang pen, Loyd George hi a, England kumpi(Prime Minister) hong hita hi. A dam sak siavuanpa nungta lai ahihmanin, “Hibang ciang hong tung dingin um thei vet keng; Wales gam-a mithupi pen pa a honkhia ka hive maw” a ci hi.

Meingong khat in zankimpi in siavuante khat zanphot ding cih bel baih kei mawk mahin ciai maw! Nute’ itna thuk luamai ei!

“Meingong tagah” ci-a guallelh maizumna, sinkham lungkhamna, maisit maidonnate na tuah laitak mahin, na tate na mitkha ah luai sak den in! Na guallelhna gam sungah na tate in gualzawhna laan hong khai nading uh hi.

NA MIZIA

* Na hehleh na heh sung pen na kihai’bawl laitak ahi hi. Banghanghiam cihleh hehna pen haina kilatna-in a kiciamteh ahi hi.

* Na kihihsakleh na kihihsak sung pen na ki naupangbawl’ laitak ahi hi. Banghanghiam cihleh naupangte pen a hinailo hi a, a kihisak nuam uh ahi hi.

* Na kiniamkhiatleh na kiniamkhiat sung pen na san laitak ahi hi. Banghanghiam cihleh a sangte a kiniamsak thei hibek a, a niamsa pen kiniamkhiat thei nawn lo hi.

*Na kilungdam sakleh na lungdam sung pen Pasian na sut laitak ahi hi. Banghanghiam cihleh lungdam laitak pen i hoih pen laitak hi a, Pasian in a hoih thei pen dinga hong bawl’te i hi hi. Lungdam laitak pen Pasian tawh kisut laitak zong ahi hi. Na Pasian’ meel na kilat sak nopleh lungdam tawntung in!

POLICE THUMAN GEN

1904 kum-a Wales gam-a Khanlawhna lianpi en dingin mundang panin mite kipai ziahziah hi. Khua sung duty Palik(police)te in, “Khanlawhna munuam-a hong pai na hih uhleh, biakinn ah hilo-in, thonginn ah pai zaw un” a ci, kici hi. Tdkhen