Tulai khuahun vaitawh kizom in Pu Tual Khan Suan (ZIUSA Executive Director) tawh holimna

Tulai khuahun vaitawh kizom in Pu Tual Khan Suan (ZIUSA Executive Director) tawh holimna

1. TP: Pu Suan, ZIUSA ah Zomi Innkuan bangzah om a, vekpi in milip member bangzah pha ihia?

PTKS: Zomi Innkuan USA kipawlna pen Local Zomi Innkuan kipawlna min tawh pawlmi (member) lut hi a, USA gamsung a munmun a phualphual a Zomi Innkuan Kipawlna (47) om hi. A munmun a om Zomi Innkuan kipawlna in a mau mun ciat ah milip member (pawlmi) nei tek zaw hi. Kammal dangkhat in a gen hi leng, Zomi Innkuan USA (ZIUSA) in Zomi Innkuan kipawlna om lohna mun a om Zomite a ding simloh mimalin pawlmi (member) dan kineilo hi. Zomi Innkuan USA in USA gamsung a om (teng) Zomite sihna ah luangphamna ding ngimna tawh Genvai kipawlna kinei a, tua sungah genvai lut pawlmi (member) pen tu ni ciangin mimal (16,258) pha hi.

2. TP: Tutung Myanmar gambup buaina tawh kisai-in ZIUSA in Statement bawl a nei hia? Tua lo e ZIUSA in USA kumpi tung leh UN lamah panlakna a nei kha hia? Ahih kei leh mailamah pan a lak theih ding geelna a om hia?

PTKS: Tutung Kawlgam sunga Galkap in thuneihna buluhna vai tawh kisai in Zomi Innkuan USA in thumanlo na sepna hi ci-in kisang theilo hi. Galkap in thuneihna a buluh vai a kisan loh, a kideihloh hangin laitawh thusuah kibawl lo phot hi. A hang bel, ZIUSA pen United States of America (USA) Kumpi Thukhun khat a hi, Non-profit Organization thumeilette phalna zui a kiphut ahi hi. Tua Non-profit organization khensung (Category) nuai ah ZIUSA pen Piakkhiatna (Charity), Siamsinna (Educational) leh Khantohna (development) lam tawh kisai thu meilet khensung ah a om hi.

Zomi Innkuan USA in tulai tak a Kawlgam sungah thuneihna Galkap in a buluh vai ah kisang theilo ahih manin, a munmun a kinei lungphona, lungkimloh lahna leh Palai leh Tangmi (Senators & Representatives) te tungah zong mimalin a hizongin laikhakna, lungkimlohna genna, mapanna kinei hi. Tua bek tham loin Kawlgam pan a USA gam a, a pem mite tawh Kawl galkap deihlohna nasepnate ah mapanna leh kihelna kinei hi.

3. TP: ZIUSA in Zogam Democracy Fund kaikhawm, cih khat na za ung. Mi bangzah in pia ta, bangzah bang ngah ta ihia? Zogam Democracy Fund pen zatzia ding geelna sa a om hia mipi theih dingin nong gen thei tam?

PTKS: Zomi Innkuan USA vaihawmna tawh Zogam Democracy Fund kikai khawm hi. Hih Zogam Democracy Fund i ngimna pen Zomite tenna Zogam sungah ki-ukna leh vaihawmna pen mimal deihtelna (self-determination) bulphuh Democracy mah kideih pen ahih manin democracy ngahna ding nasepna a zat dingin ngimna kinei hi. Zogam sungah mipi a ding suahtakna, bitna leh tan kikimna (freedom, security and equality) a om theihna ding nasepna ah kizang dingin kigel hi.

4. TP: Zomi Galkap vai ZIUSA in bang ciang support? Bang ciang support sawm?

PTKS: Zomi Innkuan USA in Zomi leh Zogam sung bitna leh mipi lung muanna a omna ding na a sem a bawl Zomi leh Zogam bulphuh Zomi galkap pen thukimpih hi. Mapan pih leh thapiak ding lunggulhna kinei den hi. Zomi leh Zogam a hu ding, a kem bit ding mi khempeuh (Zomi galkap kihel in) thapiak ding leh pahpih ding pen ZIUSA dinmun ahi hi.

5. TP: ZIUSA in hun tom leh hun sau na ngimna uh ahih kei leh na maban uh Zogam a omte theih ding khat leh nih nong share thei tam?

PTKS: Zomi Innkuan USA in hun tom (or) a piang thu zui a nasep pen piak khiatna (charity), siamsinna (education) leh khantohna (development) banah, Zomite tuah haksatna zui-in mapanna, panpihna leh huhna kipia den hi. Hun sau ngimna ah cileng bel, Zomite pen leitungah minam picing khat in i ten tenna gam kumpi leh kim le kiang mite in hong ciapteh ding leh Zomite neihsa luahsa gam leitang ngah nading nasepna dong ngimna a kinei ahi hi. Zomi Innkuan USA (ZIUSA) pen Zomite minam vai a sem ding minam kipawlna khat zong ahi hi.

6. TP: Tutung lungphonate leh Galkap langpanna ah Zomite dinmun thangah huai na sa hia? Hi ci zawdeuh leh, cih ngaihsut piaknop na nei hia?

PTKS: Galkap in Kawlgambup thuneihna a buluhna hangin mipi leh gam bup ah lungkimlohna hangin lungphona a kineih pen “mipi in a sep ding nasep sem” ahi hi. Tua hi a, mipite makaihna tawh lungphona pen a kisam thu leh tha ngah huai mahmah hi. Hiamgamna tawh langdo ding tel masak a hih loh hangin “thu manlo, gitlohna” deihlohna tawh thudam a lungphona ahih manin hoih mahmah hi.

Mipite in lampi tel theih ding a om nawnloh tak ciangin hih ciang a tung hi a, mipi neihsa thuneihna ngah kik na ding nasepna a hih manin thapiak kul hi. I omna ciat pan mapanna pen hoih mahmah a, tua panin kipawl khawm a mapan khop lam zong kisin kul ding hi. Zomite sungah zong minam bup vai khat in sangin mina bup thu tawh a luangkhawm ding thahat pawlpi (Front) khat kisam mahmah sa ing.

(Hih Pu Tual Khan Suan, ZIUSA Executive Director tawh holimna pen tulai i phut khak thute tawh kimemat kawmin Zomi mipi in ZIUSA dinmun taktak leh a nasepnate thei nuam ding ihih manin ci-in email pan dotna pawlkhat kikhak a, Pu Suan in zong lungduai takin hong dawng kik ahih manin lungdam mahmah hang. Zogam a omte, Malaysia, India, USA, EU, Australia, Japan cih bangin eima omna ciat panin Zomi minam khut khat tawi khe khat khai in kalsuan siam dingin Topan thupha hong pia ciat ta hen).