Tulai Kawlgam Khuahun (14 August)

Tulai Kawlgam Khuahun

Tulai kawlgam khuahun (current myanmar political atmostphere) tawh kisai in alung himawh Zomi tampi in gamsung gampua pan hong dong ahih man in hih lai pan ka khuak bat tantan hong hawmsawn ing.

1. Thura Shwe Mann pen party lutang pan aki lakhia bek hi aa parliament (hluttaw) lutang pan ki lakhia tuanlo hi.
2004 kum kawlgam PM Khin Nyunt azakiatma kha 2 khawng in asap lai aa “Asawtlo in Khin Nyunt zakia ding hi” ci aa agenkhol ngei journalist minthang taktak ahi Larry Jagan in nung May kha sung in Shwe Mann party lutang pan ki lakhia ta ding ci’n genkhol khin hi.
Bang hang in kila khia hiam cih ih theih lianloh hang in Thein Sein tawh kisia cih pen agin zawh sawtta aa, Aung San Su Kyi tawh zong ki uitui mahmah cih ki limgen hi. Hih thu hong pian ciang in Aung San Su Kyi in Shan state lam akhualzin ding pen cancel pah lian hi. USDP ii hawm nisim thu kizakna ahi Union Daily tuni suaklo hi. Shih Saung journal zong suaklo hi.

2. Notkhiat athuak pen Shwe Mann bek hilo in union minister (gambup vuanzi) 4 tak kihel hi.
Tua vuanzi 4 lak ah Zomi te’n ih lung himawh penpen in U Khin Yi ahi hi. U Khin Yi om nawn kei leh ih Census vai amanta hive maw kici tek hi.
Hih census pen kawl kumpi khat kia in avai hawm zawh uh zong hilo aa UN tawh kikop aa avai hawm ngiat uh ahihi. Pasian’ vaihawm ngiat hizaw hi. Tua ahih man in kawl kumpi in ama’ thu in phiat ziau theilo ding ahih man in patauh huailo hi.

3. Hih bang teng hong piang nianua mawk leh kitelna om nawn ding ahiam aci om hi.
Hih kitelna lampi zenzen pen galkap kumpi’ sialsa lampi ahi hi. Lampi dang tawh paithei nawnlo uh ahih man aa hih kitelna lampi asial uh ahi hi. 2010 lai nangawn in adeihna uh tangtunzo uh ahih man in tutung bel tangtung peuhmah ding hi. Tua ahih man in kitelna om mahmah ding hi.

Thukhupna
Hih thuteng hong pian pen Aung Thaung ii sih tawh ki gamla lo cih zong ngaihsutna lak ah hel huai hi. Khin Nyunt ii makpa Pu Kai Khan Lian/Tin Htut s/o Pu Pau Khan Thang bang Aung Thaung damlai hi leh suakta nailo khading hi aci om hi.
Thu khat ah kawl kumpi te’n hih bang in amite uh alaih sial un a thahat tektekna ding uh hizaw den hi. A deihlohte uh hemkhia ziauziau thei uh ahih man un ahampha uh hilel hi.

Lungdam
Mung Lan Thang/Thangboi
Zangkong