Tulai Kawlgam Khuahun (13 Nov) ~ Pu Thangboi

Tulai Kawlgam Khuahun (13 Nov) ~ Pu Thangboi

Tulai kawlgam khuahun tawh kisai in alung himawh pawlkhat in hong dong zeuhzeuh na hih man un hih lai pan in alung himawh khempeuh na vek un hong dawng khawm vet ing.

NLD Dinmun

Tukha kipat lam a kibawl kiallap kitelna mun 12 lak ah NLD in mun 7 ah zo hi. 2015 kum tawh teh ding in akia mahmah ta uh ahi hi. Chin state ah mun 2 lak ah NLD in mun 1 ah zo hi. Tua a zawhna mun ahi Kanpetlet zong kitelma deuh in Daw Su avazin man ahi hi. Matupi leuleu pen District nangawn apiak uh ahih hang Matu Forum bawl ding dal sese uh ahih man in tua hang tawh NLD in alel ahi hi. NLD te thangpaai lua uh kisa a dictrict piaksa nangawn uh lakkik sak in Paletwa ah tuah nuam hel uh cih kamsawn ging khawng kiza hi.

Tungen abat leh 2020 kum kitelpi teh NLD te 2015 kum lai bang zuahzuah nawnlo ding cih theihsa ahi hi. Aizong Daw Su adam lai leh bel kawlte’ tamna munte ah bel zolai sam ding uh hi. Amau’ hat mahmahna mun khat ahi Tamu na ngawn ah tutung kiallap ah lel dikdek uh ahih man in ngaihsut huai hi.

Thautawite’ Dinmun

Minam thautawi kipawlna tuamtuamte lak ah kawl tawh kilemna abawl pawl 10 pha hi. NCA cih min tawh kilemna bawl uh hi. Tua pawl sawm lak ah ahat penpen ahi KNU te’n tukha ni 10 ni in NCA vai lungkia ta uh ahihna thu tangko khia ta uh hi. Ahat nihna ahi RCSS/SSA te’n zong 12 ni in asuuk zaw lai khat tangko khia sawnsawn uh hi. “Apatna pan panpha ding” ci ngiau uh hi.

A omlai pawl 8 sung ah ABSDF te lo buang kawl tawh kido ngam kidozo ding omlo hi. ABSDF sung ah zong NCA thukim pawl leh thukimlo pawl om uh a kinaksiat sim uh hi. Tualo adangte bel saili tawh aki zandelh ngam ding vive hi. Asuuksia pen Lahu te leh cnf te ahi hi. Lahu te’n belhna ding neilai uh in cnf te bel kawlte’n delh taktak le uh ataina ding uh om hetlo hi.

Atom in gen leng tulai kawlgam khuahun in mailam manawh lo in nung lam manawh zaw hi.

Azenzen in ICC in kawl galkap mangte matna ding Warrant bang hong bawlkhiat mawk uh leh bel vaisah mahmah ding hi.

Ih kidalna ding ih kihumna ding ih kiginkholh kei leh tua hun teh ih tavaii mahmah ding hi.

(ZCD vai bel nung gen ni. Ahun om lai) Lungdam, Mung Laan Thang (Zangkong)