Tulaai leitung Thuthang Tuamtuam Updates September 15, 2014

Tulaai leitung Thuthang Tuamtuam Updates September 15, 2014

· Kumsim a kibawl den ahi International Festival (Leitungbup Khuadopawi) Bowling Green,Kentucky khuapi ah ongtungding September 27 niciang sunthapaai kibawlding a, Leitung gam 20 vaalpan minam 50 kiim te kimukhawm in khat le khat ngeina laamte kilak in ngeina van, neek le dawn cihte kiciamsak kawm in Khuado pawipi kibawlding hi. Hih pawipi sung ah Zomi Innkuan Kentucky makaihna tawh Zomi te zong nasiatak in kihelding hi.

Zomi te leitung mite lak ah minam khat ihih ban ah Zomi Innkuan Kentucky peen Kentucky kumpi te theihpih kipawlna ahihman in ki innteek mahmah ding hi. Zomi nupi te in Zogam khantoh nading in Papi te aw nobek kisan laaklaak kei unla, ko zong onghuai in ongsep ziahziah cih alimtawh etlawmtak in onglakding uha, Zolia Zotaang te inzong Zogam,Zomi khantoh nading in ongdaal ongnawngkaai sakkheempeuh Tuanlummang in, tatpeekmang ding hi ung cihlahna in Guatat ziahziah in ongdiang chengcheng ding uhhi. Akiim naai aom akihelnuamte akuakua cilo kihelthei ding a luutman $5 kila ding hi. mi 2,000 pan atungsiah phading ahihman napaibaih kei leh mawtaw koihna ding nangah zokei ding hi.

· Europe gam ah gambeel ah luutsim in gambeel ngetding asawm Africa mi 250 apua tembawpi khat Libya gam khuapi Tripoli pan kigamla lualo tuipi tung ah September 15 ni in kibung a Libya Navy te in tuitung alaam nupi gaai 36 bek honkhia zo in adangteng si uhhi. Hih gaaltaai 250 te atamzaw numei vive hi ci in Libya Navy thunei Ayub Qassem in genkhia hi.

· Thailand gam sung ah phalna tawh sumzong leh sumzuak nasem kawlgam mite Thailand palik ten lampi tuamtuam zong man,gaam cihbang in abawlna hang in KNU/KNLA te in Thailand te vanpua mawtawpi 30 Myawaddi ah September 13 ni in nainih sung man uha, Thailand palikten kawlgam mitetung atatsiatna uh akhawl kei uhleh September 18 pan kipan nasiatak gamtaangnung ci in KNU/KNLA makaai BU Tiger September 14 ni in genkhia hi.

· Pakistan gam Punjab Province sung Muzzafargarh ah mopi aciah lialia mi 30 te tuanna September 14 ni in tuikhang in vuknelh ahihman in Mopa leh asanggampa kihel mi 17 si uha, adangteng ahihleh kihonkhiazo ci in Pakistan thunei te in genkhia uhhi. Mopi ciah tuahsia peen Zomi ten zong ituah theih gige hi in Khamul ten zong nanei veve sam uhhi.

· Philippine gam tunglam teng September 14 ni in Typhon huihpi leh guah kithuah in nasiatak in nawk a inn le lo tampi asiatban ah nasiatak in mencim hi. Kumpi thunei te in state 22 ateeng mipite kidawm mahmah a muanhuaina mun zuanding in thupia uha, Vanleeng te leengsaklo in Ngasa bengte zong dayoff pia uhhi. Asi aliam bangmah kitel naailo hi. July khasung in hih Typhon hang in Philippine gamsung ah mi 98 si in mi 5 mangcip khin hi.

· British Hehpihna naseem Davis Haines IS ten angawntan leuleu na uh Video September 13 ni in akhahkhiat khitciang British Prime Minister David Cameron in hi IS te peen Muslim hilo a, Dawi Mangpa sawttaak Ngalkhawhang te ahih uhhi tua ahihman in um guigam maaiguigam bangsakding ci in September 14 ni in taangkokhia hi. US ten zong azialpih ding uh pawlzong kawikawi uha, Arab gam 10 tawh thukimna angah khit uhciang September 14 ni in French gam Paris khuapi ah gam 30 pan makaaite leh US Secretary of state John Kerry IS zialdanding kikumkhawm uhhi.

Piantit President Francois Hollande in hih IS ten leitung bup onglinglawngsak uh ahihman Leitungbup mah I tuisabuah athuakkik ding uhhi ci in genkhia hi.Tuaban ah September 15 ni pan kipan in katangval no te vanlaai ah beltung khiatkawm kakimawl sak zialzial tading ci in genkhia hi. Australia Prime minister Tony Abbott inzong US ngetna tawh kizui in IS zialding Beltungkhiat siam tangvaal 400 leh akilumlet thei zialzial paltan 200 kapuakding uh ci in September 14 ni in genkhia hi. LEilam kuan in IS te mahmah ahingmatnuam gampawlkhat kituh ziahziah uha, akuanmasa ding mee sawkding ci uhhi.

· NATO pawlpi sung gam 15 pan gaalkaap 1,300 US gaalkaap 200 akihel te in Ukraine gamsung ah daihna aomtheinading in galdo kimawlna September 15 nipan kipanding uha, ni 12 sung kimawl in US ten makaihding ci in US Defense Department te in September 14 ni in taangkokhia uhhi. Tua ban ah Ukraine President Petro Poroshenko leh President Obama te Inn kaangpi ah September 18 niciang kimuding ci uhhi. Tuaban ah NATO pawlpi te in abeisa ni 10 laai a khensatsa uh mangbang Ukraine te huhnading gaalvanleng lamkaal apailitlit laaitak ahihi. Russia tawh gaal maai samaai ah akimuding hita in muhnop to ding hi. Khialna aom leh ngaihdam bawm ah maw. Lungdam, Thang Khawm Pau ZOMi (Bowling Green , Kentucky, USA)