Tulaai Leitung Thuthang Tuamtuam Updates July 1, 2015

Tulaai Leitung Thuthang Tuamtuam Updates July 1, 2015

· USA gam South Carolina state Greeleyville khua sung a om Mivom Black te Biak Inn khat June 30,2015 nizan in kihalsak leuleu hi. Ahunlap in thunei te in delhman uh ahihman in kuamah aliam abaai asi omlo uhhi. Nung Biak Inn kikaap zawh Mivom Biak Inn 3 akihaalsakna hita ahihman in a Vom le aKaang kikaal tualgaal ongpian khaakding lauhuai mahmah hi. USA gam peen Nu le Nu Pa le Pa kiteenna aphal uhtawh, Biak Inn ahaal uhtawh Pasian umtaktak te ading in sinkham huai mahmahta hi.BBC

· India gam Bengal state nitumna lam a om Darjeeling District sung ah abeisa ninih a kipan guahtam lua ahihman in menkimcim zihziah a July 1, 2015 niciang mi 38 men in vuklum hi ci in thunei te in gen uhhi. Hih mun peen kumsim in mihau khualzin atullom asim apaina mun hi a tu in zong khualzinmi te cimawh in om ci uhhi.BBC

· Kawlgam 2008 Pingpei thukhun sung akihel ahi Parliament ah gaalkaap 25% akihelna deihlo in lungphona anei Sangnaupang makaai 4 Mandalay pan kumpi thunei te in July 1, 2015 ni in man uha, Yangon khuapi pan makaai 5 thukhenzum ah thukhenna thuakding in sam uhhi.VOA

· Egypt gam Sinai mualtung a om Egypt gaalkaap te phualpi July 1, 2015 ni in IS migilo te in busim uha, Egypt gaalkaap 64 si in suntha paai langnih kikaapnapan migilo 100 si hi ci in Egypt gaalkaap ten gen uhhi.VOA

· US gam thukhenna saangpeen The Supreme Court te Neihkibang mihing kiteentheihna aphal zawh akipan leitung muntuamtuam a om mipalaang te in Singlamteh tung ah kikhai kawm in Nu le Nu kitawp, Pa le Pa kiteep cihbang in Topa Zeisu zahko na tuamtuam nei uhhi. Russia President Vladimir Putin leuleu in June 29,2015 ni in USA te peen Pasian neilo gamte hilel uh ci in zahko hi. Zimbabwe President Robert Mugabe ciamnuih leh cihtak in USA gam White House kavazinding a President Obama kiang ah kiteengni kavaci ding ci in nubaba kawmsa in Radio sungpan June 27 ni in genkhia hi. IBTIME

· 1961 pan akikhakcip US leh Cuba kizopna Palaaizumpi July 1, 2015 ni in kihongkikta a , US gam leh Cuba gam Palaaizum honpawi kibawl tuak in gamnih I Dialkhaai kikhaikhel in kipeisak dialdial ta uhhi. President Obama in Cuba leh US gamte in tuni a kipan in Laaibu thak Laaimaai thak gelh akipanta I hihi ci in gen hi.CNN

· Canada gam a kibawl FIFA Women’s World Cup 2015 Semi Final Japan Vs England July 1, 2015 kisuihna ah Japan ten 2:1 tawh gualzawhna ngah uh ahihman in July 5,2015 niciang USA tawh Final kimawlding uhhi. Tukum zong japan ten akhatna mah ongngah kikding in ken lam en ingh.BBC

· Iraq gamsung a misual IS te Nungkum September kha pan kipan Britain ten Vanlam tawh azial sam hang angaihsut zah un gualzawhna ngah kisalo uh ahihman in Syria gam sung a IS te zong vanlamtawh nawkding MP ten genlitlit ta uha, asawtlo in kizialkha ding ci in Defense Secretary MR Fallon in July 1, 2015 ni in genkhia hi.BBC Lungdam mahmah, Thang Khawm Pau ZOMi (Bowling Green , Kentucky, USA)