Tulaai Leitung Thuthang Tuamtuam Updates January 25, 2016

· Kawlgam Makaai thakding Pi Suut Cing ( Daw Aung San Suu Kyi ) leh Kawlgam Gaalkaap Maangpi Min Aung Hlaing te phuaih January 25, 2016 ni in Nyipidaw Khuapi ah anihveina kimukhawm leuleu uha, Kawlgam mailam kalsuan ziading nai 2 sung nasiatak in kikum khawm uhhi. NLD lampan Makaai 5 kihel uha, Gaalkaap lampan Alubok zawdeuh mi 6 kihel uhhi. Pi Suut Cing leh Pu Min Aung Hliang te apuan uh cisut pian zehzah se hi.VOA

· Tusung teng Asia gamlam ahi South Korea , Japan, China leh Taiwan gam te a kumdangtawh tehna alamdang mahmah January 24,2016 ni in Vuuk tam in vot lua mahmah ahihman in Taiwan gam ah mi 85 si in Japan gam ah mi 5 si in 100 kiim liam uhhi. VOA

· USA gamsung State 13 ah January 22,2015 ni pan Nasiatak in Vuuk akiatna hang in January 25, 2016 ni ciang mi 29 in nuntaakna beilawh a, tu in ahihleh Mipi a million asim in Inn lam zuankik ta in kiim le paam hah kipanta hi. January ni in Sang atamzaw kikhak laai a, Vanleeng leengding 1,800 kikhawlsak kik in 3,225 alen hunding zekaai uhhi.CNN

· Cameron gam leh Nigeria gamgi Bodo khuapi sung ah om Vanzuakna phualpi khat ah January 25, 2016 ni in migilo ten amau le amau bomb tawh puakkham khawm uha, mi 35 sipah in tampi liam uhhi. Kumpi thunei te in Boko Haram migilo te khutma hiding in lam en uha akansan laaitak uh ahihi.BBC

· Nicaragua leh Costa Rica gam kikaal tuipi tung ah January 24,2015 ni in Mihau khualzin vaakthaap mi 32 apua Tembaw neukhat kibung a, mi 13 sipah in adang teng tupi sung ah mangthangcip laai in kizong saan hi.CNN

· Iran President Hassan Rouhani Piantit gam ah January 21,2016 nipan vazin a Iran gam sung a Khualzin Vanleeng te luui lua mahmah ta ahihman in alaih nading Piantit te kiang pan VanBus 114 leiding in January 24,2016 ni in kithukimna nei uhhi. Tuma kum 17 pan amasapeen Iran President ahihi. BBC

Lungdam
Thang Khawm Pauzomi