Tuithang ah Cope topa laibusaal kihong ~ Peter Suumpi

Tuithang ah Cope topa laibusaal kihong

April 26
Tua ni zingsang phone hong lut hi. Sun nai nih ciang Cope topa laibusaal vai kikum ding hong ci hi. Tua ni ka khuadam hi. Guah zong zu hi. Zanggam khualumna pan ka ciah zawh ni khat hipan hi. Guahzu meikai nuai ah lawm te ahi Mandalay aa lenpih siamsin te tawh kikai khawm in hong tung ding laibusaal honpawi aading hungeel kholhna khat ka nei uh hi.

Zingciang sun nai 10 Am in Sakollam Dr. Nang Khan Lian (Khanno) te inn ah ki tuntuah ding ci in kiciamna te nei in den aa ka ki kupna te uh a sem ding vaipuak ka ki khentek uh hi.

April 27
Tuni zingsanglam khua pha hi. Tuithang pai ding lawptak in ka ki thawi hi. Alol thei pen in ka van teng tawh Dr Khanno te inn lam zuan in ka pai phei hi. Tedim aa teng hih hang in khat le khat kongzing kigamla ahihman in atung masa atung nunung ki ngak in ka om uh hi. Sun nai 1 le lang hong sat ciang in Tuithang kua aa pawisim ding agamla penpen (Zangkong) pan hong pai Tg Gin Sian Suum (Suumpi) Tedim hong tung cih kazak uh ciang in ka lawpna uh hong khang semsem hi. Suumpi in kei Lawibual ah tung ing hong dawn un acih ciang in lawptak in atungsa lawmte khat in va dawn phei pah hi. Nitak lam nai 2 le lang pawl hong sat ciangin Kawlpi pan Zomi Siamsin Kipawlna-Myanmar ii 2014- 2015 chairman ahi Tg Huat Khan Kim le Siamsin senior khat ahi Tg Thang Pan Lian te hong kihel thei uh aa ki lawp semsem bek tham lo in tha ki ngah mahmah hi. Tedim pan nitak lam nai 3 pm pawl in kiding khia thei aa Tuithang khua ah nitak nai 5 pawl in ka tung uh hi.

Tuithang khua lutna khua mual pan amau nong na dawntuah uh in vaitutna in lenggahzu hai khat tek hong pia uh hi. Tua alim mahmah lenggahzu hang in mawtaw tuanna aa ka gim ka tawlna te uh koi lam tung cih kantheih nawtloh zahdong in hong veng hau hi. Tua pan ka zintunna ding mun uh ahi Tuithang khua aa lainatna sanginn lam zuan in ka pai uh hi.

Zintunna pan pawl khat te lupna kidenna pah, pawl khat kim le pam vel in ki lehleh in tawm vei ka tawlngak khit uh ciang kisil in nitak-an nekna ka nei uh hi.

Nitak-an nek khit ciang in zinbuk lam zuan nawnlo in CAG biakinn sung ah aman masasa ki ngak in zan hun ka kipan uh hi.

Zan hun ah inntek te le ko zin te mel ki theihna nei in hun nuam mahmah hi. Tua nitak in siamsin lampan thugenna ki nei in Tg Tuang Sian Mung (BDS final) in “Ha le kam sung cidamna”, Sianu Cing Van Kim in lungsim cidamna, gilpi natna vai tawh kisai genna le ZSK-MDY ii pawllutang ahi Tg Peter Thang Sian Mun in “Pilna le Siamsinna” cih thului te tawh zan hun manpha tak le nopci tak in kizang hi.

April 28
Tu ni zingsang khuapha hi. Honpawi rehasal bawl zawh nading in TSI (Tuithang Siamsin innkuan) in moh le niangtui hong vakin gilvah phitphetsa in laibusaal hong ding in ka kiging litlet uh hi.

Tuni pen ni manpha ahihi. Tuni pen zomi te tangthu sung ah siamsin te’n laimai thak khat agelh ni ka ci nuam hi. Khuasung pan zum nasem te, hausa upa te, azahtak huai pawipi tuamtuam pan upa te le khuasung nulepa te hih honpawi sim ding in hongpai in hong tu dimdiam uh hi. Hi lai mun ah CAG pawlpi kem sia a ahi Rev. Thang Khan Do i hong nusiat huhau in kithanem mahmah in amah zong ki phawk mahmah hi. Lam-et ngam loh na kawmkal sung pan hih laibusaal hong hon sak ding in Tedim pan Dr Vum Lian Thang (Mandalay siamsin advisor, victoria hotel Mandalay, မႏၲေလးခ်င္းလူမႈေရးအသင္း ၏ ဥကၠဌ, Cope topa laibusaal pian khiat nading kawmiti ii chairman) le Rev Pum Khan Nang (Zomi encyclopidia) te hong kihel thei ahihman in tha nemna te tha hong dim kik cih ding ahi hi.

Hun hong kipan in phatna lasak khit ciang Dr Nang Khan Lian in hih laibusaal tawh kisai thugenna le Dr Sian Nun Siam ii hong laikhak simna hong nei hi. Azom ah Tg Huat Khan Kim (ZSK -Myanmar chairman) i thu genna, ZSK -Myanmar in ZSK- Mandalay tung ah lungdam pihna lai piakna, Dr Vum Lian Thang tung pan thugenna le Rev Pum Khan Nang te tung pan thu genna nei in laibusal hong honsak khitciang Sia Nang Gin Lian (Tuithang Christian fellowship ii vice chairman) in thupha piakna tawh Cope topa laibusaal honpawi zingsang lam hun akizo ahihi. Hih honpawi ah hong kihel mimal khempueh pen inntek pawlpi in voksa tawh sun-an vakna nei hi.

Sun-an nek khit ciang in siamsin te le inntek Cope topa laibusaal kawmiti te kimuh khopna kinei in tua lai ah ZSK-Mdy ii piak ding akisam lai sum 500,000ks pen piakna kinei hi. Tua lai ah inntek lam pan sum sazian lahna le gencianna te hong nei uh hi. Hih kimuhkhop hun pen nitak lam nai 3:50 pm pawl in lawhcing takin kizo hi. Tua khit ciang nitak an nekma in khuasung avak nuam te vak in suakta takin ki om hi.

Nitak-an nek khit ciangin biakinn sung mah ah kituah kik in atawp ni nitak hun kibawl ta hi.

Nitak hun ah ZSK-Mdy in Cope topa laibusaal kawmiti (Tuithang) tung ah apna laipi piakna nei hi. Tg Huat Khan Kim in nau neihzia tawh kisai thugenna, Lia Khai Gin Cing in cidamna tawh kisai thugenna, Sia Peter En Lam Suum in inntek te tung le zin mangpi te tung ah lungdam kohna agen khit ciang Tg Gin Sian Suum in ‘a pil toto mipite’ cih thulu tawh thugenna hong neih khit ciang a nunung nitak hun nuamtak in kigualzo hi.

Tua nitak guahzu hi. Siamsin te nungak tamgval vive ki hi in inntek nungak tangval te tawh kikhen nuam naikei zong kikhen hun hong tungta ahihi.

April 29
Ut nai ta kei leng inn lam zuat ding hun hong tungta aa zing an nek khit ciang siamsin te inn lam zuan in Tuithang khua pan ki ciah khia ta hi. Gualzawhna, lungdamna, lungnopna, lenglenna (nungak le tangval) te anamkim in ki lawhcing hi. Hih in zomi te ii tangthu sung ah siamsin te lem laimai thak ahihi.

Laigelh -Peter Suumpi (Zingsol)