Tui Ciin Buai Hun Sungah Lai Siangtho Nipi Hong tungta

Tui Ciin Buai Hun Sungah Lai Siangtho Nipi Hong tungta

LAI SIANGTHO NIPI (Bible Sunday)
August 16st , 2015

Thupatna:
Kumsim in ih bawlzel Lai Siangtho nipi 2015 kum zong bawl kik thei ding–ih hih man-in Ama kammal Lai Siangtho bu a hong neisak Pasian tungah ih lung a dam hi. Hun masa lai in Leitung tui ciin tawh sawp a, asawt lo mei tawh sawp dinga, ahih hang hih AMA kammal te mang thang lo ding hi.

I. LAI SIANGTHO

(1)Lai Siangtho (Bible):

Lai Siangtho in cih kammal in Latin kammal “Biblia” pan a hong piang ahi hi. Greek kammal ciangin“ biblia” a hih kei leh atam lam genna ah “Biblion” hi-in atawm genna ah “ Biblos” hi a, Mikangte kam ciangin“a book” Laibu khat cihna tawh ki bang hi.

(2). Lai Siangtho bu leuleu ciangin Latin lai-in “scriptura” ongci uh a, mikanglai-in, “Scripture” hong ci uh a, “ What is written” “ Writing book” cih hi a, “a kigelhsa lai” cih-in khiatna nei hi.

(3) A laibu hihna taktak pen:“ Holy” –Siangtho cih min hong vawh uh hi. A cihnopna-in, A kammal nei pa mah in gelh ahih man in agelh pa Siangtho mahmah ahih man in, laibu “ Book”cih bek sangin “Holy Bible” hong ci uh a, ei Zolai tawh “Lai Siangtho” ih ci uh hi.

(4) Lai Siangtho in Pasian Kammal hi. Hebialai-in “Dabar” ci uh a, “Yahweh’s Dabar” a cih uh ciangin“ Pasian kam sungpan hong pusuak Kammal” a cihna uh ahi hi.

(5) Thuciam cih kam mal: Latin te kammal “testamentum” Hebiate lai-in “Berith” cih hi a, mikanglai-in “covenant” ci-in Pasian leh mihingte kikal ah thu ciamna” cih na ahi hi.

(6)Lai Siangtho Laibu tuam pian a hihna:

Lai Siangtho pen laibu tuamtuam bu 66 a kigawm khawm laibu ahi hi.
Kum 1500 sung aki kaikhawm laibu ahi hi.
Mi 40 val bangin agelh laibu ahi hi.
Lai gelhtesungah mi dawltuamtuamkihel hi. Kumpite, galkap mangte, thu ngaihsun siamte, gam makai(politician)te , siahdongte, ngabengte, la phuahsiamte, music siamte, mipilte, leh tuucingte, kihel uh hi.
Asia gam, Africa gam leh Europe gam thum pan a kigelh laibu ahi hi.
Hih Lai Siangtho pen aki pat cilcil in Zeisu tuallenna munte lai namthum tawh ki gelh masa hi. Ami namlai uh ahiHebialai, Pautang a aki zang Aramaic lai leh Greek lai tawh kigelh masa hi.

II. LAI SIANGTHO NIPI HONG PIANNA ATOM IN:

Lai Siangtho NIPI apian-na tangthu atom in hi bang ahi hi. Mary Jones in Jacob leh Molly sung pan-1784 kum in Wales gam, Tynaddol khua ah suak hi. Akhua uh pan tai 2 gam latna ah Rev Thomas Charles in Lai sinna sang khat phuan a, tualai tak ah sang kah in asia pa in Lai Siangtho sim in sawl kha a, Lai Siangtho bu atawi khak nuam lua mahmah in nikhat niciang kei ading zong nei ning ci in ngaih sunsun hi.

A hi zongin amau innkuan siam gan mi zawng ahih man un Lai Siangtho neih zawh ding pen mual mong et bang hi. Apan’ mihau te sim loh buang ei mizawngte adingin lei zawh ding hi lo hi ci hi. Anu in ata nu deih luatna amuh ciangin abul pat nadingin Aktal khat leh Akpi khat pia hi. Apan’ zong akhuai khawizuu te uh azuak theih nadingin gen hi. Atanu uh nuam lua mahmah in “tun ahau khin hi ta ingei” ci kha liang hi.

1800 kum in Mary in akhua pan tai 25 gam latna Bala khua ah Mr. Charles in LST zuak cih za hi. LST zuak pa pen Mary ngaih sutna ah kumpi khempeuh sangin alian zaw, Solomon sangin apil zaw dingin ngaih sun hi.

Nikhat LST lei dingin avapai a, azuak pa kiangah ava dawp leh azuakpa in LST pen mihau te bek in leizo ban ah, lei zo mah le cin zong sim thei ding na hia ci hi. Tua teng agen khit ciangin London pan a Welsh LST teng beikhin-in ka lawmpa ading bu khat bekbek omlai.. acih leh Mary a khitui tak keuh keuh hi. A deih luatna amuh ciangin azuak pa in lei sak hi. LST tawh hong ciah a, aciah lam ciangin lampi pen tai tom no dan in tuat hi. Akhua zangbup un en in, lungdam pih uh hi.

March 7th , 1804 ni-in London ah mi 300 kikhawm in Lai Siangtho khen te kipawlna tu-in (UBS) aki ci hong piang hi. A makaiTuiphum pawlpi mi mah ahi hi.Tua akipan tuni dong zom to suak uh a, LST nipini ih sum ngahte tualai ah ki puak khawm in LST man oltak in ilei thei ta hi.

LAI SIANGTHO MANPHATNA:
Pasian kam mal ki bat pih te:
Khaici (Seed) tawh kibang hi (Lk. 8:11).
Gal phualpi a susia zo galhiam tawh kibang hi(IIKor. 10:4).
Meikuang tawh kibang hi (Jer.20:9)
Sek tawh kibang hi (Jer. 23:29)
Meivak tawh kibang hi (Late 119:105)
Limlang tawh kibang hi.(James 1:23)
B. Akam mal nei pa gelna hi.
Lei pian ma pek in agelsa hi (2Peter 1:20-21)
Van leh lei amangzongin amang lo ding Pasian kammal hi (Matte. 5:18).
A hun acin ciangin mi bangin hong piang hi (Gal.4:4).
C. Pasian kam mal ih zat dan ding (2Tim. 3:16, 17)
Mi hoih lo te mihoih hih nading lam lahna hi
Thuman thutak hilh nading hi
A khialte tai nading hi.
Aman lo te aman in puah nading hi.
Ki thuhilh nading aman pha mahmah ahi hi.
D. Pasian kammal leh Mihing te ki zopna:
Pasian kammal tawh nungta zaw hi (Matt. 4:4).
Lang nih ahiam namsau sangin hiam zawlai in asia ahi a, apha ahi zong mihing nuntaakna ah piangsak thei kammal hi (Heb. 4:12).
Kha leh lungsim, guh leh tang ki tuahna, guh leh guh ngek dongin khen khia thei hi (Heb 4:12)
Mihingte’ lungsim ngimna leh a ngaihsutna te zong theithei hi
(Heb 4:12).
Lai Siangtho lui pan Lai Siangtho thak bup pi –ii ngimna pen Singlam teh thu, Zeisu thu bekbek ahi hi. A bawlsa mihing te khat na ngawn a mangthang ding adeih loh man in Lai Siangtho Pasian kammal a BU in a nei ih hi hi.

Thukhupna: LST in a om nailo nate apiang sak Pasian kammal hi. A pian sak sa nate nadang khat ah akhel thei kam mal hi. Taksa An bang in ih KHA nuntakna AN ahi hi. LST ih neih manpha mahmah a, lei tungah anei nailo mi tampi tak om lai hi. Hun khat lai mihau te bek neih zawh Pasian kammal tu-in ei mizawngte in zong nei zo ih hih man in zong lung dam koh huai hi. LST bup-pi a gennop (amungtup) pi-in Pasian Itna, atapa Zeisu hong piakna, Mawhna hong maisakna leh tawntung nuntakna hong piak, hong pai kik nading thu te ahi hi.

Rev Hen Khan Go