Tuhun Social Media zatzia ~ Joshua Mung

Tuhun Social Media zatzia ~ Joshua Mung

Leitung khuahun luanzia te tawh kizui-in Media te panmun in mun hongla mahmah ta hi. Biakpiak na, sangkah na, nasep na, Bank, Centerlink……etc, te akipan Social Media te ahi Facebook, Page, Instagram, Youtube, Website, Viber, ZOOM…..etc, cihte kizangh tota ahih man in, hihte koi ci zat leng hoihpen/safety pen ding i lungngaih khop ding deih hang.

Media koi cih zatding?

Photo, video, song, lai…..etc, na post zualkhat in thautang sangin khauh zaw thei gige hi. Tua ahi man in thukhat peuhpeuh (information) na post zual na-in mi lungdam sakthei ahih mah bangin, mi lungkham sak thei cih zong phawk tek ni. Tua ahih man in post khatpeuh i post ma-in athute limtak ngaihsut phot ding hoih pen hi.

Post khatpeuh na copy ciang in credit pia hamtang in!

Tuhun pen thuhoih, thuhoih lo, thuman tawh amanlo tawh online tung aki thehkek zikzek pahpah ahih man in, post khatpeuh namun ciang in athu hong pai na (source) te limtak kan mansa in. *Tuate limtak natel khit ciang in post khatpeuh na share (or) copy ciang credit pia hamtang in.

“Credit” i cih in, thukhat peuhpeuh ahong paikhiat na amasa pen (original) anei te ii a min, page name…..etc, te gelhsak hamtang ding hoihpen hi. Hih bang credit napiak na-in a post nei masate zahtak bawlna hi a, lamkhat pan genle hang; information te thuman le manlo pen amau tawh kisai ahihi.

Subcribe, Share, Like & Follow te tawh tha kipia ni!

Ei Zomi sungpan mi mintang khat peuh, namdangte tawh i ek khak ciang in subcribe & like te tam nei zo naihet lo hi hang. Ahang in, i mimal mi kitam zonailo ban a, aom sunsun teng in subcribe & like tawh tha kipia kimkhin gai nailo hi hang.

Post khat peuh namuh ciang in thana ngahnak le subcribe, share, like & follow napiak zuai na-in lai at (writer) te tha dimtuam sak mahmah hi. Ei zong tuate i deihmah bang in midang te a zong i piaksak ding; Zomi akua ma khempeuh tha ki pia hi hang. Joshua Mung (Adelaide)