Trump President dingin acin manin lungphona neihna piangkawikawi

Trump President dingin acin manin lungphona neihna piangkawikawi

Nov. 10, 2016: Zan in Trump President ding a kiteelcing manin Hillary gum a, Trump deih lo pawlte a sung uh tawh kituak vet lo hi ding hi ven New England panin Kansas City leh West Coast cihte ah lungphona nasia takin mi za tampi in nei uh hi. Hih bangin lungphona neite omna mun Seattle ah thau zan nitak 7:00 pm kikap a, mi nga in liamna tuak in, sih theihna ding zahin nih nak liam mahmah uh hi.

Hih bangin lungphona pen Trump a cin’ khit phet in California college campuses leh Oregon ah piang pah a, police ten khua lai-leh UCLA campus ah mi 500 kiim in Trump a deih lohna uh tangko in awng keek gawp uh hi ci uh hi. University of California campuses sung leh a kianga om Berkeley, Irvine, Davis leh San Jose State sungah zong sung tawh kituak lo pawlin lungphona nei uh a, Oakland ah zong mi 100 kiim in lungphona nei uh hi ci-in KNTV-TV in suaksak a, lungphona nei ten Trump lim (effigy) hal in Oakland Tribune newsroom tawlet limlangte a den’siat ban uh-ah mawtaw peite hal in, meikuangte lawn uh hi.

California Highway Patrol ten lungphona munah nupi khat car in taih kha in liamna tuak hi ci-in gen hi. Oregon a lungphona nei ten downtown Portland traffic dal uh a, meileeng lampi nih zong a dal man un meileeng a hunin pai thei lo hi.

Trump International Hotel & Tower kiangah zong Columbus Circle kicihna ah lungphona neihna om a, police ten Trump Tower kianga om 57th Street ah 5th Avenue khak uh hi. WABC in New York a lungphona nei 10,000 kiim pha a, mi 65 kiman ta hi ci hi. Chicago, Washington DC leh LA City Hall ah zong lungphona om hi. Tu dong lungphona nei mi 124 kiman ta hi.

Leitung adingin democray upa pen gam kicihna ah zong mi a tam zawte deihna tawh a kiteel President deih loh manin lungphona piang ta zen hi. “I lawh khak/bat loh theigah pen suang tawh kilawn/kideng hi,” cih bel man mahmah hi. Source : ABC News/ Thang Khan Lian