Trump’ National Security Adviser Michael Flynn kitawp

Trump’ National Security Adviser Michael Flynn kitawp

Feb. 14, 2017: US President Donald Trump in national security adviser dingin a zat Michael Flynn in US kiteel ma-in Russia uliante tawh kihona (contact) a neih manin hih thu hangin buaina lianpi leh mawhsakna lianpi piang hi. US ulian khatin amau mimal bekin gamdang tawh diplomacy vai gen ding kiphal lo ahih manin a sepna panin kitawpna lai (resignation letter) pia hi.

Flynn in a kitawpna lai-ah, “Kamsiatna tawh thupiang hong manlang mahmah ahih manin Russian ambassador tawh phone in ka kihona thu tawh kisai a kicing loin (incomplete information) tom kim in Vice President Mike Pence leh midangte kiangah ka zasak a, ka kitawpna lai ka pia hi. President Trump’ vaihawmna ah nipi kal thum sung ka sep manin angtang kisa mahmah ing,” cih tuangsak hi.

Trump in national security adviser thak ding a guan’ kik ma-in White House National Security Council Chief of staff len leh General pension Keith Kellogg in acting national security adviser len phot ding hi.

Flynn pen Trump administration lente lak-a a poimawh pen (number one) ahih banah leitunga thupiang tuamtuam Trump tungah thu a zasak leh hilhna hoih pia (adviser) ahih banah Trump in policy adviser dingin sawt a zat pen ahih manin Trump’ kongcingpa (gatekeeper) kici liang hi.

Trump insung pua lam adingin Flynn pen Trump tawh sawt kikhawl pen hi a, US gam-a agencies poimawh diak teng – State Department, Pentagon leh intelligence agencies khempeuh (FBI, CIA leh NSA) tawh White House kizopna thu khempeuh a kizomsak (connects) ahi hi. Hih banga Trump administration lente lak-a mi poimawh pen a kitawp mawk pen Trump adingin suphuai mahmah a, tua loin hih bang buaina hangin a kitawp pen maizumhuai mahmah hi.

US President kiteelna ah Russian intelligence ten DNC-te computer hack sak hi cih kanphatna kinei lailai hi. Flynn in Obama’ hunin US in Russia tungah khalna a koihte zong lak khiat ding na hanciam hi. Source: Al Jazeera and Agencies/ Thang Khan Lian