Canada, Toronto khuapi sungah mawtawhawl khatin mi 9 taihlum, adang mi 16 liam

Canada, Toronto khuapi sungah mawtawhawl khatin mi 9 taihlum, adang mi 16 liam

Canada, Toronto khuapi sungah Van mawtawhawl khatin Monday ni in mipi omna nawkgawp a, mi 9 taihlum in adangzong mi 16 bang liamgawp cih Reuters News pan kiza hi.

Canadian Police te genkhiatna ah Monday sunlam sun annek hunpawl in thupiang hi a, khetawh lampaina Sidewalk dungteng ah khetawh apai Pedestrians te anawkgawp cihi.

Van mawtaw tawh anawkgawpna pen tai 1 mile (1.6 km) sungbang hiding kici hi. Canadian Broadcasting Corporation (CBC) te genkhiatna ah tua Van Driver papen amin Alek Minassian kici a, kum 25 aphakhin khat ahihi.

Government Officials te genkhiatna ah Alek Minassian pen thautawi migilo kipawlna Militant Group khatpeuhtawh kizopna omlo hi ci’n genkhia uhhi.

Migilo tetawh kipawlna omlo ahihleh banghangin hihpa in mipi ommuang kimlai, banghangin mawtaw tawh hihbangin nawksakgawp hidinghiam ci’n dotna kinei a, ahi zongin Officials te’n bangmah dawngkiknuamlo uhhi. Tua Van Driver papen kimankhin a, tulaitak kumpi thunei te’n akepcing laitak uh ahihi.

Toronto Deputy Chief Peter Yuen in agenkhiatna ah hihvai pen sawtpi hunla in hoihtak kancian kulding hi ci’n genkhia hi. Hihbuaina apianlaitak in amukha Witness khatin agenkhiatna ah Van Driver pa’n mipi te ngimngiat in anawkpheigawp tawh kibanghi ci’n genkhia hi.

Canada’s Public safety minister asemlaitak ahi Ralph Goodale in agenkhiatna ah hihbuaina vaitawh kisai in aki kanciansan laitak ahih manin, tulian in athu genkhiat theihding akician omnailo hi ci’n News Conference ah pulakkhia hi.

CBC te khahkhia Video sungah ageinai ah ading mikhatin Video zaihkha ci a, Van Driver papen Police te’n amatding uhciangin “hong thatlum un” ci’n Officer te otsan cihi. Tuaban ah Officer tezong vankhattawh ngimbawl in, otsan cihi.

Video: A rented van jumped onto a crowded Toronto sidewalk Monday, killing nine people and injuring 16 before the driver fled and was quickly arrested in a confrontation with police, Canadian authorities said

Hih buaina ah akizang Van mawtaw pen ahawlpa ii neihsa hilo sawnsawn a, mawtaw kikawmna “Ryder Rental” te neihsa hisawnsawn hi.

Tua ahih manin, mawtaw akawmsak Ryder System Inc spokeswoman Claudia Panfil in agenna ah buaina sungah akihel Van mawtaw pen ko ii Company neihsa khat hi a, kumpi thunei tetawh thukanna ah akisam bangbangin kasemkhawmding uhhi ci’n genkhia hi.

Abeisa tawlkhatsung akipan Europe gamsung leh United States gamsung muntuamtuam ah mawtaw tawh mi ommuang nawkphial sakgawp cihbangdan gitloh gamtatna pen hongom kawikawi hi.

More: Canada ah pasal khatin temta tawh amuhpeuh dawtgawp in mi 5 liam

Nungkum October 31 ni inzong New York khuapi sungah tuabang buaina hangin mi 8 takin sihlawh uhhi. ISIS galkap migilo te’n thauvui thautang aki zattheih lohna munte ah tuabangin mawtaw zangin ngongtatna bawlding tawsawn uh kici hi. Sawltak #zomidaily