Topa Sua Mung’ Siampi Suah Lai

Topa Sua Mung’ Siampi Suah Lai

Topa Sua Mung’ siampi suah pawi pen kaneu thumang mawh khat hi. Neu mahmah lai kaihteh bang kum aimawk tam ka cihcih laitak tuni atangthu tom Liankip Pa ‘ suahsak ka etteh 1985 kum hih tuak hi. (Edited: March 23, 1985)

Siampi asuah khit teh a inn vuah pawipi khat khaam uh hi. Aw ngaihsakna (loud speaker) tawh la kihong ziahziah in ih galzak bek pen noptuak mahmah khin hi.

Ka Ute leh ka punote tawh ka huan sung vuah singgah ne in katut ngeingai laitak un la hong kihon ziahziah teh ommawk thei nawnlo in “Pai ni ei” kaci lian uh hi. A utlo khatzong ka omkei uh hi.

Sunsiah Bel

Aphual katun zawh uh asawtlo in an hong kilui pah hi. “Na uum pah vo” Ong kicih loh hang ko unau putu teng in ka uum phei pahlian uh hi. Ciangpi sungah nahtangteh kiphah in tua tung ah an leh meh kithuk khawm ahi hi. Ko unau putu teng ciangpi khat ah ka dimlian uh hi.

Gilkial pian ban ah sialsa lim mahmah ahih man in tampi kakhuk uh hi. Ka kham pian ciang un ka punote khat bang in “Sunsiah Bel puakha leng hoih ding hiven” ciliang hi. Limsa sim ahih man in nekik nuam lai hingel ding hi.

Tonzang ah pawi tampi kasiim ngei hang Topa Sua Mung’ siampi suah pawi mah phawkphawk kahih man in nuam kasakpen khat hiding hi.

Lungdam Huai Veve

Ong damloh kazak phet in kalung nuam hetlo hi. Ong nusia akicih sawnsawn ciang in kadah semsem hi

Akum ka et ciang in kum 63 ci ahih man in Pasian in kum hizah anuntak sak “Lungdam huai Veve” kasa hi. Kum 60 val nuntak ding abaih hetlo thu khat ahi hi. Ih dah mahmah kawmkal ah “Topa kum hitan nong nuntak sak Lungdam ung” cithei bilbel leng Pasian’ deihna Khat tawh akituak khatam kaci giugiau pong hi

Adah akap khempeuh Hehnemsiam Huhpa Khasiangtho in hong hehnem kim ciat ta hen. Dahna lianpi tawh, Mung Laan Thang (Tonzang, Zogam)