Tonkhawm ni, Kalsuan khial nawnlo ding hihang

Tonkhawm ni, Kalsuan khial nawnlo ding hihang

A vawhvawh a suansuan om in, a khannang’ leiza pia, tuibuak pawlkhat leh a minciang anla pawlkhat zong I om kei-leh, a gah te lei ah kia-in, muat-in nektheih om nawnlo ding a hi.

A vawh a suan khempeuh in zong, a nekkhak kimloh hang, mi-vawhsa mi-suansa teng bek a ngak pawlkhat ki-om thei mawk hi. Van aa leng vasa te’n zong, lokho hetlo napi’ puuksilo I ci teeita zong, ei leitungmi’ thu ngaihsun theite aa ding’ ki-awi huai, kisuan huaisam hi.

Khangtampi suakta lo, hong kikhumcip bektham lo, silah nungta aa hong kikoih , hong kipaam paih zawh, sawtlua khin, mimai enbek zahdong in,lungsim leh pumpi ki zawngkhal-lua khinta maw? Mailam thukhualna leh diktatna, min leh vang zong khualzo nawn lo-in om paisuak ding I hiam? Sipian leh Masala gimnam in hong tuamcip zo luata maw?

Pu Pa te bang, phualva bangin, ciampello ki-itna te koi ah khusuak mangkhin a hiam? Na omna pan hong ciah kik inla, a thak in kalsuankhawm pha ni. Na-tu na-ta te’n nangbek hong ngaklai hi. Ki theihmawh bawl ken, kisik den ding hi hang.

Lungnuntaak bangin, mai aa tuahteng ne den dingin, hong bawl Pa-in hong phalsam lo ding hi. I innkuan, I minam, I gam leh lei’ mailam ding thathak la-in, gentelna tawh kalsuan khiat ding kisam ta hi.

Mihing te hong thupii sak’ khinkhai theihna leh pilvangna I zatsiam ciang-in minuamsa hongsuak sak hi. Khantohna, phattuamna omlo cih thei gige napi’ a ngeimah ngeingei’ sullui zuiden ding te hilo hi hang. I-tu I-ta, khua leh tui’ I it takpi leh ei nektawm ankuang ding bek khuallo aa, a kul leh zong gim leh tawl, gilkial dangtaakna I thuakzawh hong kul ding hi.

Ka-tu ka-ta, ka-gam ka-lei khantohna ding leh phattuamding deih ingh I cih takpi leh, tu leh tu aa angsungbek khual nektawm zong te leh guahnuai dainuai ci-lo aa, hatsatna namkim a tuakzong thasial lo-in, a sem paisuak salpha te’ tehvet ding zong hilo cileng hong kikhialsak nawnlo ding hita hi.

Abeisa kum 5 sung-in, kua in ei hong khualzo huaizo takpi hiam? Milip tawmlai eite aa ding-in, ei leh ei ki uk theihna I neih kei leh ka beh, kakhua, ka awsuah I cihcih laitak in namdang te’n hong nelhsiah behlai ding aa, minam mangthang I suakgai lelding hi. Nang lek kei, I pianna I minam a deihsak takpi, ei leh ei ki-uk theihna (Federal State) ding’ a hanciam taktak kua te hiam? Nang thapiak leh na laptoh ding hong lam-en hong muang uh hi.

I metang(vote) guaksuak sak nawn kei ni. Khuadak in, I hun-hoih te khahsuah nawn kei ni. Hong pai kik pakpak nawnlo ding hi. Pianna gamlei nibang taangta hen. Nantal’suan (Kawlgam 2015 kiteelna ah, ZCD leh NLD thapiak nopna tawh)