Thuthang koici gelhding

Thuthang koici gelhding

NEWS: A ki ci Thuthang pen mite theih huai le mi te theihnop thu te a hihi. NEWS a ki cih mah bang in, North, East, West, South mun tuamtuam a thupiang te ki hel hi.

MEDIA: Thu khat “information” peuh peuh apian na mun pan mitampi in a theih nading in a puak te media ki ci hi. Media nam tuamtuam om hi. Printed media, Broadcast media, electronic media etc.

Leitung ah thu tampi te, second sim in piang piang aa, ei tawh ki sai, ki tuak thu le i lunglut thu te pen ei ading Thuthang (News) hong hi pah hi. Thuthang gelh zia tam pi om hi. Tua teng lak ah akitam zat pen le tuhun thuthang gelhna ah ki zangh thu te ki kum ni.

News report in gelh dan
Aki tam zat pen pen leh amuibun (effective) pen pen ahi hi. Hi dan in ki gelh ciang in, a thuthang pen laisim ten’ minit tawmno sung in thei pah uh aa, mi tam pi in ki sim pen hi.

Tuhun ciang in, sim ding thu tam lua a hi man in, asua diat duat a ki gelh thuthang te ki sim kim zo lo hi. Tua te ah zong, atung lam te ki sim in hun ngah lo te a nuai lam sim suak nawn lo uh hi. Tua mah bang in thuthang i gelh ciang, inverted triangle dan in ki gel hi. Inforamtion athupi pen te ki tam at pen in, tua nung pan a thupiit na tawh ki zui in ki tawm at sem sem hi. Ahih hang in thuthang khat in a ki sam inforamation te kicing tak in piak ding thupi mahmah hi.

Athupi pen informations te laigual khat tawh gelh (What, When, Where, Who, Why, How)
Atung athu te a kicing zaw a gelh
Mi te muhna, feeling te
A huam thu (or) abeisa thu te tomno in gelh (brief)

1) Thuthang’ thu laigual khat in ki at masa hi. (Apualam mi munpan 3rd Person in ki gelh hi.) Tua sung ah, What, When, Where, Who, Why, How te a ki sam bang bang in tomkimcing in ki gelh hi.
2) Atung a thu te a ki cing theithei in ki gelh kik hi.
3) Tua thutawh ki sai thunei te, a mu kha te, a theician te i kampau te ki gelh hi.
4) Tua thu tawh ki sai, adang theih huai thu tuamtuam te ki gelh hi. Gtn in Khuadopawi thu gelh ding hi le hang, (hih a nuai a thu pen a pualam ah a piang tatak hilo hi.)

Zongeina khuadopawi Mandalay City Hall ah ki bawl
Zomi te ngeina Khudopawi pen 30th October, 2009 ni, nitaak lam nai 2:00 pm pan 9:00pm dong City Hall, Mandalay ah Mandalay Zomi Innkuan te makaih na tawh ki bawl cih thu ki za hi.

Pawi ah, Chin Social Welfare Organization le Mandalay Zomi Innkuan pan panmunlen te, Biakinn tuamtuam pan Pasian nasem te Upa te, Mandalay Zomi innkuan te, khangno lia le tang te le a ki sam lengla te ki hel thei uh a mi 400 val bang pha hi.

Khuado pawi thu genna, Khangham pi le pu te kiang pan thupha dawhna te ki nei ma sa hi. Tuakhit ciang in, khangno ten ngeina lamna, ngeina puan lakna te nei uhi. Nitaak nai 5:00pm ciang in Khuado Ankuangum khopna ki nei hi.

Nitaak nai 6:00 pm a ki pan in Khuado Concert ki pan in nitak nai 9:00 ciang in Khuado lapi sak na tawh pawi ki man sak hi.

“Hih bang in i Ngeina Khuadopawi i bawlzawh man in lungdam huai sa mahmah ing. Mailam ah khangthak momno ten’ a zopsuak zawh nading zong thupi sem lai ding hi.” ci in Pa ABC in (Zingsol or Siamsin Awging etc. hong) gen hi.

“Tuni bel nuam tak mah ei! Mai kum khudopawi bang ngaak lah phial hang e.” ci in ABC pawlpi khangno makai Tg. XYZ in gen hi.

Khuado pawi pen Zomi nam te ngeina lak ah a thupi pen hi a Mandalay Khua ah a khat veina in kibawl na a hi hi.

Pelloh Zuihding: Thuthang ki gelh ciang in, lai gelh pa in limlang (mirror) bang in gelh kuul hi. A piang thuthang tung ah a ma idea, deihna, hoih a sak na, hoih a sak lohna, hanthawtna, zahpihna cih te khat zong ki hel thei lo hi. Tua te a ki hel ciang in Thuthang hi nawn lo hi.

Hih dan pen Zolai tawh ki gel thukizakna te ah tampitak ki mu thei hi. Thupiang khat tawh kisai, hoih sakna, hoih sak lohna, lungdampihna, zahpihna, dahpihna te ki gelh na in Kipawlna khat hi leh amau pawl i thutangkona hi a, mimal hi leh
opinion pulakna hong suak hi.

Veina bek tawh,
Siambawi