Thuthak Tomkimcing 22 Oct 2014

Thuthak Tomkimcing 22 Oct 2014

A. CNDP in Kalay,Tamu, Khampat ah zum hong:

Maikum kiteel na ah akihel nuam Chin state min tawh aminthang simsim CNDP party in Chin state sung bek hilo in Kalay, Tamu leh Khampat khua pi te ah tusawng sungteng giah phual sat in zumhon na kivik pha mahmah ahihi. Hih khuapi huam sung ah Chin minpua mimal tulsawm nih kim bang kihel ding in muang mawh uh ahih man in maikum Myanmar gambup kiteelna ah kuanglui theih nading in pansan la mahmah cih ciang kitheih sak khinzo ahihi. Hih kim ah adiak in kawl te kikhem zolo ding hi a, Zomi te sung ah hong lut in vote kilam en mahmah uh hita mah leh ZYA mazang simsim ahih man lunghimawh veve uh cih kiza hi. ZYA pen party ahihloh zenzen hang in minam vai muibun simsim ding lam en khin zo uh hi.

B. Kalay- Tamu mawtaw lamkim innmun Teintul sim man tazen;

Kalay myo khuapi ah mitam semsem in innmun in cinzo nawnlo in om ahihi. Mitam nazui in Kalaymyo khuapi behlap nading munthak thunei te in gel uh a, Kalay- Tamu lamzin dung toteng leh Myohla leh Aungthitxsa veng kikal teng khuathak ding in kumpi thunei ten akigel ciang in Tein 80 man na mun te Tein 1000 in kah to a, Tein 50 man mun Aungthitxsa leh Myohla veng kikal innmun te tein 500 in kilei vetvat ci in thuthang ah kigelh khia hi. 40ft x 60ft tein 50 akisa kimlai tein 300 in kikun in kilei tahial cihi.

C. Thugen zia aki atukalh nammaw ? kici.

Siamsin pawl khat te vai hawmna tawh gamthum kingawm ngeina lahna Hakha ah kibawl ding ahihi. India leh Bangaladesh pan hongpai te’n Zofate cih kampau nak zat mahmah ding uh a, Kawl gamsung pan Chin kilo zel ding ahih man in minlawh zia tawh zakna noploh na om maimai ding kici hi. Ahang thu in India leh Bangaladesh om te in ei mau tualsuak Zo citek uh a Myanmar sung om Chin state in media ah Chin in agelhkhiat hang in Mizo pau tawh akigelh te Zofate in tangokhia ahihi. Ei te in Kawl mi leh Vai mi icihcih hang in Burma mi leh Bharat mi te in ei cihna lawh na Kawl leh Vai in kilou hetlo,kisam het lo in om cih India leh Bangaladesh om Zofa ten tel mahmah uh hi. Tua man in Zofate insuih khawm dialdial ang u cih in muibun zaw ding kicihi. Mizo in Mizo hi a, India in zong mizo ci huhi. Kawl icih burma in zong lai agelh sial in Mizoram in gelh uh ahih man in chin sang in Zofa, Chinmi sang in Zomi in khuavel ah ei leh ei min pholakna thupizaw ding in ngaisang zaw uh a hihi. Kawl te in Kalar acih hang in amau kalar in kilo lo uh a, Zomi te in Vai icih hang in amau Vai in kilo lo uh hi. Tua ziak in ei mau mindiktak leh ngeina min diktak khuavel in theihna kisam zaw in mu khia uh hi.

D. Lasak , Laam , Agelh , Atum kidemna.

Minam kim State ai awh in Lasakna Laamna, Agelh, Atum siam kidemna Myammar gamsungah amun tek ah kumsim in kibawl den hi. Chin State ah Zomi in lasakna lam ah kidawk den ahih hang in laam lahna, Agelh kidemna Atum siam kidemna ah minuai ah kiom den hi.
Tua man in Zomi ading kumsim hunthupi ah ilaam nei nam te kituak tak in laamsiam lah na in minam laam picingsak hi. Adiak in Daaklaam, Sawngsik laam,Phitlaam leh Zolaam te ei Zomi te neihsa mihon laam nam te ahih man in laam lahsiam mahmah ikisam hi cih Minister Mung in gen khia hi. Hau Thang