Thuthak tomkim ~ The Tedim Post (05 Aug)

News In Brief: Thuthak tomkim ~ The Tedim Post (05 Aug)

Kum khat val bang internet aki khakcip Rakhine leh Chin State Township 8 te ah August 1, 2020 ni-in Internet line kihong kik ta hi ci-in Kumpi thunei te in tangkona nei khin himah taleh 2G network line bek kingah ahihman in internet kizang thei tuan lo hi, ci-in khuami ten gen uh hi.

Myanmar gamah 2020 kum January akipan July 11 ni dong သွေးလွန်တုပ်ကွေး Dengue Tauhkui (Natgual) vei mimal 4121 pha in a sihlawh mimal 32 pha ci hi.

2020 kiteelpi ah galkap huang sunga mee piakna phual(mee-zum) 632 te galkaplen pua lam kituah ding hi, ci-in UEC in tangko khia hi. A beisa 2015 Kiteelpi ah galkaplen huang sungah mee-zum 844 om ci hi.

88 Sangnaupang makai Ko Ko Gyi makaihna ahi People’s Party (PP) in 2020 kiteelpi ah township 70 pan mimal 150 val in ka dem ding uh hi, ci-in tangko uh hi.

Guahtui tamluatna hangin Mon State, Township 4 ah tuikhang hi, cih thu kiza hi. Township 4 te in Thahtone, Kyaikmayaw, Muhdone leh Thanphyu Zayat te ahi uh hi.

Japan Mitsubishi Motors Company in Myanmar gamah mawtaw bawlna phual hon dingin lunggulh hi, ci-in CEO Osamu Masuko in gen hi. Tulaitak Mitsubishi in Vietnam, Thailand, Indonesia leh Philippine gam te ah zum ahon laitak ahi hi.

India te huhna US dollar Million 200 tawh AC Kultal lampi akibawl laitak ahi Kale-Kalewa-Monywa lampi 2021 kum May khasung in kizo ta ding a, Kale pan Monywa kikal nai 4 bek kipai ta ding ci hi. Hih India-Myanmar Friendship lampi project pen 2018 Kum May 27 akipan hi a, 2021 Kum May 27 zawhsiang ding hi, cih kiza hi.

USA gam, California State, Riverside Township ah Acres 4000 val gamkatna hangin mipi 8000 kiim bang inn leh lo nusia in kihem uh ci hi.

India gam, Panjab State ah Kumpi phalloh Zuu-tuh huan adawn kha mi mimal 86 in sihlawh uh ci hi. Kum simin India gamah Zuu-tuh dawn khakna hang tawh mi 50 kiim bangin sihlawh den uh hi.

Covid-19 pul natna hangin Leitung bup sumbawlna kiatna hang tawh Japan gam a company 400 val in Bankruptcy (ဒေဝါလီခံ) uh ci hi. Japan gamah Covid-19 natna ngah 36000, asi 1000 val pha uh hi.

China (Sen) Bytedance Company neihsa ahi Tik Tok Application pen Microsoft Company tungah ni 45 hun sungin a zuak nadingin Donald Trump in thupia ci hi.

More: Twitter, Facebook, Instagram leh YouTube te gamtatzia tawh kisai President Trump in thupia

August 4, 2020 ni Leitung bupah Covid-19 natna ngah Tein 180 val(18,317,520), asi Tein 6 leh tul 90 val (694,713) leh adam kik Tein 95 val (10,936,782) phata hi. Source : 7day news, , Eleven Media, Myanmar Times, DVB, Irrawaddy.